काठमाडौँ– निर्वाचन आयोगले प्रतिनिधिसभा सदस्य निर्वाचनमा हुने प्रचार–प्रसार खर्चलाई पारदर्शी, मितव्ययी र अनुशासित बनाउन नयाँ कार्यविधि लागू गरेको छ। आयोगले मङ्गलबार ‘प्रतिनिधिसभा सदस्य निर्वाचन प्रचार–प्रसार बैङ्क खाता (सञ्चालन तथा व्यवस्थापन) कार्यविधि, २०८२’ स्वीकृत गर्दै दल र उम्मेदवारलाई प्रचार खर्चका लागि अनिवार्य रूपमा छुट्टै बैङ्क खाता खोल्नुपर्ने व्यवस्था गरेको हो।
कार्यविधिअनुसार राजनीतिक दलले आयोगको सचिवालयमा र उम्मेदवारले सम्बन्धित निर्वाचन कार्यालयमा निवेदन दिएपछि मात्र बैङ्क तथा वित्तीय संस्थाले खाता खोल्नेछन्। दलको हकमा बढीमा दुई जना पदाधिकारीको संयुक्त दस्तखत र उम्मेदवारको हकमा उम्मेदवार स्वयं वा उसले तोकेको व्यक्तिको दस्तखतबाट खाता सञ्चालन हुनेछ। प्रचार–प्रसारसँग सम्बन्धित सबै आम्दानी र खर्च नेपाली मुद्रामै तथा बैङ्क खातामार्फत गर्नुपर्नेछ।
२५ हजार रुपैयाँभन्दा बढी सहयोग नगदमा लिन नपाइने र एक लाख रुपैयाँभन्दा बढी सहयोग लिँदा सहयोगदाताको पूर्ण विवरण खुलाउनुपर्ने व्यवस्था गरिएको छ। सरकार, सार्वजनिक संस्था, विदेशी निकाय तथा निषेधित संस्थाबाट सहयोग लिन पूर्ण प्रतिबन्ध लगाइएको छ।
निर्वाचनपछि खर्च विवरण सार्वजनिक गरी बुझाउनुपर्ने र ३५ दिनभित्र खाता बन्द गर्नुपर्नेछ। खर्च अनुगमनको जिम्मेवारी कोष तथा लेखा नियन्त्रक कार्यालयलाई दिइएको आयोगले जनाएको छ।
