जर्मनी सरकारको विकास सहयोगमा ग्रामीण तथा अर्ध–सहरी क्षेत्र लक्षित घुम्ती कोष सञ्चालनका लागि राष्ट्र बैंक–राष्ट्रिय वाणिज्य बैंकबीच समझदारी

काठमाण्डौ। ग्रामीण तथा अर्ध–सहरी क्षेत्रमा दिगो आर्थिक विकास प्रवर्द्धन गर्ने उद्देश्यले सञ्चालनमा रहेको ग्रामीण तथा अर्ध–सहरी क्षेत्रको दिगो आर्थिक विकास परियोजनाअन्तर्गत स्थापना गरिएको घुम्ती कोष सञ्चालनसम्बन्धी समझदारी नेपाल राष्ट्र बैंक र राष्ट्रिय वाणिज्य बैंकबीच सम्पन्न भएको छ। उक्त समझदारी वित्तीय पहुँच विस्तार गर्दै साना तथा मझौला उद्यमको प्रवर्द्धनमार्फत स्थानीय अर्थतन्त्र सुदृढ गर्ने लक्ष्यका साथ गरिएको हो।

जर्मनी सरकारको विकास सहयोगमा स्थापित घुम्ती कोषलाई प्रभावकारी रूपमा सञ्चालन गरी ग्रामीण तथा अर्ध–सहरी क्षेत्रका उद्यमी तथा व्यवसायीलाई सहुलियतपूर्ण वित्तीय सेवा उपलब्ध गराउने उद्देश्य राखिएको छ। यस कोषमार्फत उत्पादन, रोजगारी र उद्यमशीलता विस्तारमा सहयोग पुग्ने अपेक्षा गरिएको छ।

सम्झदारी कार्यक्रममा ग्लोबल आईएमई बैंक लिमिटेडका प्रमुख कार्यकारी अधिकृत सुरेन्द्रराज रेग्मी, राष्ट्रिय वाणिज्य बैंकका प्रमुख कार्यकारी अधिकृत देवेन्द्र रमण खनाल, नेपाल राष्ट्र बैंकका गभर्नर प्रा. डा. विश्वनाथ पौडेल, नेपाल राष्ट्र बैंकका कार्यकारी निर्देशक दयराम शर्मा पंगेनी, उप–मिसन प्रमुख डा. बेन्जामिन साइडेल तथा माइकल सुम्सर सहभागी रहेका थिए।

२०८२ माघ २७ गते सम्पन्न उक्त समझदारीले स्थानीय उद्यमशीलता विकास, रोजगारी सिर्जना तथा समावेशी आर्थिक वृद्धिमा महत्वपूर्ण योगदान पुग्ने सरोकारवालाहरूको विश्वास रहेको छ।