ग्यास अभावको चर्चा बढेसँगै विद्युतीय चुलोतर्फ उपभोक्ताको आकर्षण

काठमाडौँ। बजारमा खाना पकाउने ग्यास अभाव हुने चर्चा बढेसँगै विद्युतीय चुलोतर्फ उपभोक्ताको आकर्षण बढ्न थालेको छ। ग्यास सहज रूपमा नपाइने आशंका र ऊर्जा विकल्प खोज्ने प्रवृत्तिका कारण बजारमा विद्युतीय चुलोको माग केही बढेको व्यवसायीहरूले बताएका छन्।

मध्यपूर्वमा पछिल्लो समय चर्किएको भू–राजनीतिक तनावले विश्वव्यापी इन्धन आपूर्ति शृङ्खलामा असर पारेपछि नेपालमा पनि यसको प्रभाव देखिन थालेको छ। नेपालले प्रयोग गर्ने पेट्रोलियम पदार्थमध्ये ठूलो हिस्सा भारतबाट आयात हुने भएकाले अन्तर्राष्ट्रिय परिस्थितिले देशको भान्सासम्म प्रभाव पार्ने गरेको छ। पछिल्लो समय खाना पकाउने ग्यास सहज रूपमा उपलब्ध नहुने चर्चा र पेट्रोल पम्पहरूमा लाइन बढ्न थालेपछि उपभोक्ताहरूले वैकल्पिक ऊर्जा प्रयोगबारे सोच्न थालेका छन्।

विद्युतीय सामग्री बिक्री गर्ने व्यवसायीहरूका अनुसार पछिल्लो सातादेखि विद्युतीय चुलोको माग केही बढेको छ। काठमाडौँका केही बिक्री केन्द्रमा दैनिक करिब आठ वटा विद्युतीय चुलो बिक्री हुने गरेको बताइएको छ। सामान्य अवस्थामा महिनामा आठदेखि दस वटा मात्र बिक्री हुने चुलोको माग अहिले बढ्न थालेको व्यापारीहरू बताउँछन्।

नेपालमा लोडसेडिङ अन्त्य भएपछि वि.सं. २०७५ सालदेखि नै घरायसी प्रयोजनमा विद्युतीय चुलो प्रयोग क्रमशः बढ्दै आएको छ। तर अझै पनि धेरै उपभोक्तामा विद्युतीय चुलो प्रयोग गर्दा बिजुली धेरै खर्च हुन्छ भन्ने धारणा रहेकाले प्रयोग विस्तार हुन सकेको छैन।

विद्युतीय सामग्री आयातकर्ताहरूका अनुसार अहिले बजारमा चुलो अभाव हुने अवस्था भने देखिएको छैन। तर अन्तर्राष्ट्रिय बजारमा इन्धनको मूल्य बढेमा ढुवानी खर्च बढ्न सक्ने भएकाले भविष्यमा मूल्यमा केही प्रभाव पर्न सक्ने सम्भावना रहेको उनीहरूको भनाइ छ।

नेपाल विद्युत् प्राधिकरणका अनुसार काठमाडौँ उपत्यकामा हाल विद्युत् आपूर्तिमा कुनै समस्या छैन। अहिलेको विद्युत् खपत जाडो महिनाको अधिकतम मागभन्दा कम रहेको छ। ग्यास अभावको अवस्था लामो समयसम्म कायम रहेमा विशेषगरी बेलुकाको समयमा विद्युत् माग केही बढ्न सक्ने अनुमान गरिएको छ।

बजारमा विद्युतीय चुलोको मूल्य गुणस्तरअनुसार फरक–फरक हुने गरेको छ। सामान्य चुलो करिब तीन हजार पाँच सय रुपैयाँदेखि सुरु हुन्छ भने गुणस्तरीय चुलो आठ हजार रुपैयाँभन्दा माथिसम्म पाइने गरेको व्यवसायीहरूले बताएका छन्।