सात वर्षपछि नागढुंगा–सिस्नेखोला सुरुङमार्ग सञ्चालनमा आउँदै, पहिलो चरणमा आपतकालीन सवारीलाई प्रवेश

काठमाडौं । काठमाडौं र धादिङलाई जोड्ने नागढुंगा–सिस्नेखोला सुरुङमार्गको सोमबार उद्घाटन हुने भएको छ। शिलान्यास भएको करिब सात वर्षपछि सुरुङमार्ग औपचारिक रूपमा उद्घाटन गरी सञ्चालनमा ल्याउन लागिएको हो। करिब २९ अर्ब रुपैयाँ लगानीमा निर्माण गरिएको उक्त सुरुङमार्ग उद्घाटनपछि चरणबद्ध रूपमा सवारी आवागमनका लागि खुला गरिनेछ।

सोमबारदेखि सञ्चालनमा आए पनि सुरुवाती चरणमा सबै प्रकारका सवारीलाई सुरुङमार्गमा प्रवेश दिइने छैन। पहिलो दिन आपतकालीन प्रयोजनका सवारीलाई मात्र सुरुङ प्रयोग गर्न दिइनेछ। त्यसपछि चरणबद्ध रूपमा निजी तथा सार्वजनिक सवारीलाई सुरुङमार्ग हुँदै काठमाडौं आवतजावत गर्न अनुमति दिइनेछ।

सुरुङमार्गमा पैदलयात्री, दुईपाङ्ग्रे सवारी तथा डिजेल, पेट्रोललगायत प्रज्वलनशील पदार्थ बोकेका सवारीसाधनलाई प्रवेश निषेध गरिएको छ।

सुरुङमार्ग प्रयोग गरेबापत सवारीसाधनअनुसार शुल्क तिर्नुपर्ने व्यवस्था गरिएको छ। काठमाडौं भित्रिँदा कार तथा भ्यानले ६५ रुपैयाँ र बाहिरिँदा ६० रुपैयाँ शुल्क तिर्नुपर्नेछ। मिनीबस तथा टिपरले भित्रिँदा ११५ रुपैयाँ र बाहिरिँदा ८० रुपैयाँ तिर्नुपर्नेछ। त्यसैगरी, बस तथा ट्रकले काठमाडौं भित्रिँदा २६० रुपैयाँ र बाहिरिँदा २०० रुपैयाँ शुल्क तिर्नुपर्नेछ। हेभी ट्रकका लागि भने भित्रिँदा ६०० रुपैयाँ र बाहिरिँदा २५० रुपैयाँ शुल्क निर्धारण गरिएको छ।

नागढुंगा–सिस्नेखोला सुरुङमार्ग निर्माणको शिलान्यास तत्कालीन प्रधानमन्त्री केपी शर्मा ओलीले २०७६ कात्तिक ४ गते गरेका थिए। प्रारम्भिक सम्झौताअनुसार आयोजना ४२ महिनाभित्र सम्पन्न गर्ने लक्ष्य राखिएको थियो। तर, कोभिड–१९ महामारी, मुआब्जा विवादलगायत कारणले निर्माण कार्यमा ढिलाइ भएको थियो।

शिलान्यास भएको करिब चार वर्षपछि २०८० साउन २२ गते सुरुङमार्गअन्तर्गतको ‘रेस्क्यु टनेल’को ब्रेक थ्रु गरिएको थियो। तत्कालीन भौतिक पूर्वाधार तथा यातायात व्यवस्थामन्त्री प्रकाश ज्वाला, भौतिक पूर्वाधार राज्यमन्त्री नन्दा चपाईं, नेपालका लागि जापानी राजदूत किकुता युताका तथा जापान अन्तर्राष्ट्रिय सहयोग नियोग (जाइका)का प्रमुखलगायतको उपस्थितिमा रेस्क्यु टनेलको ब्रेक थ्रु गरिएको थियो।

रेस्क्यु टनेलको ब्रेक थ्रु हुँदा मुख्य सुरुङको करिब ८२ प्रतिशत निर्माण सम्पन्न भइसकेको थियो भने मुख्य सुरुङतर्फ ५०६ मिटर खन्न बाँकी थियो। त्यसको करिब १० महिनापछि मुख्य सुरुङको समेत ब्रेक थ्रु भएको थियो। तत्कालीन प्रधानमन्त्री पुष्पकमल दाहाल ‘प्रचण्ड’ले २०८१ असार ३ गते मुख्य सुरुङको ब्रेक थ्रु गरेका थिए।

आयोजनाअन्तर्गत मुख्य सुरुङको लम्बाइ २.६८ किलोमिटर रहेको छ भने आपतकालीन सुरुङको लम्बाइ २.५५७ किलोमिटर छ। सुरुङ निर्माणका लागि जापान सरकारको १६ अर्ब ५० करोड रुपैयाँ र नेपाल सरकारको ६ अर्ब रुपैयाँ लगानी रहने गरी सम्झौता भएको थियो। निर्माणका क्रममा लागत बढेपछि जापान सरकारले थप ५ अर्ब रुपैयाँ ऋण सहायता उपलब्ध गराएको थियो।