प्रतिनिधिसभाको बैठक बस्दै

काठमाडौं: संघीय संसद्अन्तर्गत प्रतिनिधिसभाको बैठक बिहीबार बिहान ११ बजे बस्ने भएको छ। संसद् सचिवालयका अनुसार बैठकमा अर्थमन्त्री डा. स्वर्णिम वाग्लेले अर्थसँग सम्बन्धित केही नेपाल कानुन संशोधन तथा खारेज गर्ने विधेयक, २०८३ लाई थप छलफलका लागि सम्बन्धित समितिमा पठाउने प्रस्ताव पेश गर्नेछन्।

बैठकमा सभामुख डोलप्रसाद अर्यालले पूर्वप्रतिनिधिसभा सदस्य तथा संविधानसभा सदस्य गोपालमान श्रेष्ठको निधनप्रति श्रद्धाञ्जली व्यक्त गर्दै शोक प्रस्ताव पनि प्रस्तुत गर्ने कार्यसूची रहेको छ।

यसैदिन बिहान ११ बजे नै विधायन व्यवस्थापन समितिको बैठक पनि बस्नेछ। बैठकमा ‘संघीयतामा विधायिकी अन्तरसम्बन्धः नेपालमा अभ्यास, आवश्यकता र चुनौती’ विषयमा अभिमुखीकरण कार्यक्रम सञ्चालन हुनेछ। यस कार्यक्रममा संघीय प्रणालीमा कानुन निर्माणको प्रक्रिया, त्यसका चुनौती र सुधारका सम्भावित उपायबारे छलफल गरिनेछ।