तारागाउँ रिजेन्सीमा, बौद्धको जग्गा र होटल लगानीमा समितिको सेयर स्वामित्व घटेको विषय रहस्यमय

काठमाडौं । बौद्धस्थित आफ्नो स्वामित्वमा रहेको जग्गा तारागाउँ रिजेन्सी होटल लिमिटेडमा लगानी तथा भाडामा दिएको सम्बन्धमा समितिको सेयर स्वामित्व घटेको विषयमा छानबिन गर्नुपर्ने देखिएको छ। समितिले प्रारम्भमा होटलमा कायम गरेको सेयर स्वामित्व हाल कुनै स्पष्ट पुष्ट्याइँबिना घटेको देखिएपछि यस विषयमा आवश्यक छानबिन गरी यथार्थ विवरण सार्वजनिक गर्नुपर्ने औँल्याइएको हो।

समितिको स्वामित्वमा रहेको बौद्धस्थित कुल ३०४ रोपनी जग्गामध्ये १४९ रोपनी ५ आना १ पैसा ३ दाम जग्गाको मूल्य १५ करोड रुपैयाँ तथा अन्य भौतिक संरचनाको मूल्य २ करोड रुपैयाँ कायम गरी तारागाउँ रिजेन्सी होटल लिमिटेडमा सेयरका रूपमा लगानी गरिएको थियो। उक्त सम्पत्ति २०५१ जेठ २ गते हस्तान्तरण गरी प्रतिकित्ता १०० रुपैयाँका दरले १७ लाख कित्ता सेयर लगानी गरिएको उल्लेख छ।

यसैगरी, समितिले थप १४८ रोपनी जग्गा होटललाई भाडामा दिएको छ। उक्त लगानी तथा जग्गा भाडाबाट आ.ब २०८१।८२ मा समितिले लाभांशबापत १ करोड ४३ लाख १६ हजार रुपैयाँ र भाडाबापत ४२ लाख ९२ हजार रुपैयाँ आम्दानी गरेको छ।

समितिले सुरुमा होटलको ३९.७७ प्रतिशत सेयर स्वामित्व प्राप्त गरेकोमा हाल कुनै स्पष्ट पुष्ट्याइँबिना उक्त स्वामित्व ९.०१ प्रतिशतमा कायम भएको देखिएको छ। सेयर स्वामित्व घटेको विषयमा विगतका प्रतिवेदनहरूमा समेत प्रश्न उठाइएको भए पनि हालसम्म यस सम्बन्धमा कुनै निर्णय हुन नसकेको उल्लेख गरिएको छ।