‘प्रधानमन्त्री दैवी प्रकोप उद्धार कोष’को नाममा फर्जी अपिलबाट सावधान

काठमाडौं । विपद्को वर्तमान अवस्थालाई दुरुपयोग गर्दै सामाजिक सञ्जालमार्फत राहत तथा उद्धारका नाममा ठगी हुनसक्ने भन्दै सरकारले सर्वसाधारणलाई सचेत गराएको छ।

प्रधानमन्त्री तथा मन्त्रिपरिषद्को कार्यालयले सूचना जारी गर्दै केही व्यक्तिले सामाजिक सञ्जालमार्फत ‘प्रधानमन्त्री दैवी प्रकोप उद्धार कोष’ तथा ‘प्रधानमन्त्री राहत कोष’को नाम प्रयोग गरी व्यक्तिगत बैंक खाता वा विद्युतीय भुक्तानी माध्यममा रकम जम्मा गर्न आग्रह गर्ने गरेको पाइएको जनाएको छ।

कार्यालयका अनुसार विपद्को समयमा राहत सहयोगका नाममा नक्कली विवरण तथा फर्जी अपिलसमेत सार्वजनिक भइरहेका छन्। त्यसैले सहयोग गर्न चाहने व्यक्ति तथा संस्थाले अनधिकृत व्यक्ति वा सामाजिक सञ्जालमा प्रसारित अपिलका आधारमा रकम नदिई प्रधानमन्त्री तथा मन्त्रिपरिषद्को कार्यालयको आधिकारिक वेबसाइट वा प्रमाणित सामाजिक सञ्जाल पेजमार्फत मात्र जानकारी लिएर सहयोग गर्न आग्रह गरिएको छ।

सरकारले आधिकारिक सूचना तथा विवरणका लागि प्रधानमन्त्री तथा मन्त्रिपरिषद्को कार्यालयको वेबसाइट opmcm.gov.np तथा प्रमाणित सामाजिक सञ्जाल पेज facebook.com/OPMCMNP प्रयोग गर्न अनुरोध गरेको छ।

विपद् राहतको नाममा कसैले ठगी गरेको वा ठगी गर्ने प्रयास गरिरहेको आशंका भएमा तत्काल नजिकको प्रहरी कार्यालय वा साइबर ब्यूरोमा जानकारी गराउन पनि कार्यालयले आग्रह गरेको छ।

शंकास्पद गतिविधिबारे जानकारी वा गुनासोका लागि प्रवक्ता तथा सूचना अधिकारीका रूपमा ९८५१२८६७७१, ९८५१२८६७७० र ९८५१२८६७७२ मा सम्पर्क गर्न सकिने कार्यालयले जनाएको छ।

विपद्का बेला राहतका नाममा हुने आर्थिक ठगीबाट जोगिन सामाजिक सञ्जालमा प्रसारित सूचना तथा बैंक खाता वा विद्युतीय भुक्तानी विवरणको आधिकारिकता पुष्टि गरेर मात्र आर्थिक सहयोग गर्न सरकारले आग्रह गरेको छ।