भोटेकोशी बाढीपछि पुनर्निर्माणमा सहयोग गर्ने दक्षिण कोरियाको प्रतिबद्धता

काठमाडौं । परराष्ट्रमन्त्री शिशिर खनाल र दक्षिण कोरियाका विदेशमन्त्री चो ह्युनबीच भोटेकोशी बाढीपछिको खोज, उद्धार तथा राहत अभियान र विपद्पछिको पुनर्निर्माणका विषयमा छलफल भएको छ।

सिंहदरबारस्थित परराष्ट्र मन्त्रालयमा आइतबार भएको भेटवार्तामा दुवै मन्त्रीले भोटेकोशी नदीमा आएको विनाशकारी बाढीपछि जारी खोज तथा उद्धार कार्य, राहत व्यवस्थापन र हराइरहेका दक्षिण कोरियाली नागरिकको खोजीबारे छलफल गरेका हुन्।

भेटमा परराष्ट्रमन्त्री खनालले बाढी प्रभावित क्षेत्रमा अन्तर्राष्ट्रिय सहयोग जुटाउन दक्षिण कोरियाले पठाएको अन्तरनिकाय द्रुत प्रतिकार्य टोली तथा कोरिया विपद् राहत टोलीलाई धन्यवाद दिए। उनले मानवीय सहायता तथा राहत सामग्री उपलब्ध गराएकोमा समेत दक्षिण कोरियाली सरकारप्रति आभार व्यक्त गरे।

मन्त्री खनालले विपद्पछिको सरकारको प्राथमिकता अब उत्थानशील, दिगो र सुरक्षित पूर्वाधार निर्माणतर्फ केन्द्रित रहेको बताए। पुनःस्थापना, पुनर्निर्माण तथा दीर्घकालीन विपद् व्यवस्थापनका लागि दक्षिण कोरियाबाट निरन्तर सहयोग प्राप्त हुने अपेक्षा पनि उनले व्यक्त गरे।

दक्षिण कोरियाका विदेशमन्त्री चो ह्युनले नेपालमा विपद्पछिको पुनर्निर्माणमा सहयोग गर्न आफ्नो सरकार इच्छुक रहेको बताए। जलवायु परिवर्तनका कारण नेपालजस्ता हिमाली तथा जोखिममा रहेका मुलुकले भोग्नुपरेको क्षतिप्रति अन्तर्राष्ट्रिय समुदायको ऐतिहासिक जिम्मेवारी रहेको उल्लेख गर्दै उनले जलवायु परिवर्तनका असरबारे विश्व समुदायलाई थप सचेत गराउन नेपाल र दक्षिण कोरियाले सहकार्य गर्नुपर्नेमा जोड दिए।

उनले जलवायु परिवर्तनका विषयलाई संयुक्त राष्ट्रसंघीय जलवायु सम्मेलन (कोप) लगायत अन्तर्राष्ट्रिय मञ्चमा उठाउनुपर्ने धारणा राख्दै नेपालले अन्तर्राष्ट्रिय समुदायबाट प्राप्त गर्नुपर्ने वित्तीय सहयोगका लागि दक्षिण कोरियाले समेत आवाज उठाउने प्रतिबद्धता व्यक्त गरे।

भेटवार्तामा दुवै देशबीचको दीर्घकालीन मित्रता, पारस्परिक विश्वास र सहकार्यलाई थप सुदृढ गर्दै द्विपक्षीय सम्बन्धलाई नयाँ उचाइमा पुर्‍याउन निरन्तर नजिकबाट काम गर्ने प्रतिबद्धता दोहोर्‍याइएको थियो।