एनएसी भवनलाई बहुमञ्जिला पार्किङ बनाउन संघीय सरकारसँग अनुमति माग्दै महानगर

काठमाडौँ। काठमाडौँ महानगरपालिकाले न्युरोडस्थित नेपाल वायुसेवा निगम (एनएसी)को भवनलाई बहुमञ्जिला पार्किङका रूपमा विकास गर्न संघीय सरकारसँग अनुमति मागेको छ। राजधानीमा बढ्दै गएको पार्किङ समस्या समाधान गर्न सीमित स्थानको अधिकतम उपयोग गर्ने उद्देश्यले महानगरले यस्तो प्रस्ताव अघि बढाएको हो।

काठमाडौँ महानगरपालिकाकी कार्यवाहक प्रमुख सुनिता डंगोलले आइतबार काठमाडौँ महानगर प्रहरी बलको ३४औँ वार्षिकोत्सवका अवसरमा आयोजित कार्यक्रममा एनएसी भवनलाई बहुमञ्जिला पार्किङमा परिणत गर्न महानगरलाई अनुमति दिन संघीय सरकारसँग विशेष अनुरोध गरिएको जानकारी दिइन्।

उनका अनुसार न्युरोडको कोर क्षेत्रमा पार्किङको समस्या बढी रहेकाले एनएसी भवनमा बहुमञ्जिला पार्किङ निर्माण गर्न सके त्यस क्षेत्रको पार्किङ व्यवस्थापनमा महत्वपूर्ण सहयोग पुग्ने महानगरको अपेक्षा छ।

डंगोलले काठमाडौँको भौगोलिक क्षेत्रफल सीमित रहेकाले पार्किङ व्यवस्थापनका लागि नयाँ ठाउँ थप्नेभन्दा उपलब्ध स्थानको अधिकतम र व्यवस्थित उपयोग गर्नुपर्ने आवश्यकता रहेको बताइन्। बढ्दो सवारी चापसँगै पार्किङको समस्या पनि निरन्तर बढ्दै गएकाले यसको दीर्घकालीन समाधानका लागि प्रणालीगत योजना आवश्यक रहेको उनको भनाइ छ।

महानगरपालिकाले काठमाडौँभरको पार्किङ व्यवस्थापनको अवस्थाबारे विज्ञमार्फत अध्ययनसमेत गरिरहेको उनले जानकारी दिइन्। अध्ययनको प्रतिवेदन केही समयभित्र प्राप्त हुने र त्यसमा प्रस्तुत सुझावका आधारमा राजधानीको पार्किङ व्यवस्थापनसम्बन्धी आगामी योजना तय गरिने उनले बताइन्।

महानगरले उपलब्ध स्थानको उचित उपयोग, पार्किङ संरचनाको विकास तथा व्यवस्थापन प्रणालीलाई थप व्यवस्थित बनाउने गरी काम अघि बढाउने डंगोलको भनाइ छ। उनका अनुसार पार्किङ समस्यालाई तत्कालीन व्यवस्थापनसँगै दीर्घकालीन र वैज्ञानिक योजनामार्फत समाधान गर्न महानगरपालिका अघि बढिरहेको छ।