कामना सेवा विकास बैंक र महासंघबीच सातै प्रदेशमा व्यवसायिक क्षमता अभिवृद्धि तालिम सञ्चालन गर्ने सम्झौता

काठमाडौं। कामना सेवा विकास बैंक लिमिटेड र नेपाल उद्योग वाणिज्य महासंघबीच सातै प्रदेशका साना तथा मझौला व्यवसायीको व्यवसायिक क्षमता अभिवृद्धि गर्ने उद्देश्यले तालिम सञ्चालनसम्बन्धी सम्झौता भएको छ।

महासंघको केन्द्रीय कार्यालयमा आयोजित कार्यक्रममा बैंकका नायब प्रमुख कार्यकारी अधिकृत विनय दाहाल र महासंघका महानिर्देशक डा. गोपाल तिवारीले सम्झौतापत्रमा हस्ताक्षर गरेका हुन्। कार्यक्रममा महासंघका अध्यक्ष अन्जन श्रेष्ठ, वरिष्ठ उपाध्यक्ष सुरकृष्ण वैद्यलगायत पदाधिकारी तथा परिषद् सदस्यहरूको उपस्थिति थियो।

सम्झौताअनुसार सातै प्रदेशमा साना तथा मझौला व्यवसायीलाई लक्षित गरी व्यवसाय सञ्चालन, वित्तीय व्यवस्थापन तथा वित्तीय अनुपालनसम्बन्धी क्षमता अभिवृद्धि कार्यक्रम सञ्चालन गरिनेछ। कार्यक्रमलाई क्रमशः अन्य क्षेत्रमा समेत विस्तार गर्ने योजना रहेको महासंघले जनाएको छ।

सम्झौतापछि आयोजित कार्यक्रममा महासंघका वरिष्ठ उपाध्यक्ष सुरकृष्ण वैद्यले तालिमबाट उद्योगी तथा व्यवसायीको वित्तीय ज्ञान र वित्तीय अनुपालनसम्बन्धी क्षमता अभिवृद्धि हुने अपेक्षा व्यक्त गरे। उनले कार्यक्रमका लागि सहकार्य गरेकोमा बैंकलाई धन्यवादसमेत दिए।

त्यस्तै, बैंकका नायब प्रमुख कार्यकारी अधिकृत विनय दाहालले उद्योगी तथा व्यवसायीलाई आफ्नो वित्तीय विवरण तयार गर्न, वित्तीय व्यवस्थापन सुधार गर्न तथा आवश्यक वित्तीय अनुपालन कायम गर्न सहयोग पुर्‍याउने उद्देश्यले तालिम सञ्चालन गरिने बताए। तालिममा सम्बन्धित सरोकारवालाको सहभागिता रहने र आवश्यक प्राविधिक सहयोग बैंकले उपलब्ध गराउने उनले जानकारी दिए।

बैंकले सुरक्षित, जिम्मेवार, प्रविधिमैत्री तथा दिगो बैंकिङ अभ्यासमार्फत संस्थागत सुदृढीकरण र व्यवसाय विस्तारलाई प्राथमिकता दिँदै आएको जनाएको छ। नयाँ सहकार्यले साना तथा मझौला व्यवसायीको वित्तीय क्षमता विकासमा सहयोग पुग्ने बैंकको अपेक्षा छ।