काठमाडौं । झापाको मेचीनगर–६ काँकरभिट्टास्थित अरुणोदय इङ्लिस बोर्डिङ स्कुलको आवासीय भवनमा एक शिक्षिकाको शव फेला परेको छ। मृतक सर्लाहीको लालबन्दी–२ की २९ वर्षीया कविताकुमारी ढुङ्गाना हुन्।
उनी आफ्ना श्रीमान् रतन गुप्तासँग विद्यालय परिसरमै रहेको आवासीय कोठामा बस्दै आएकी थिइन्। दुवै जना गत वैशाखदेखि सोही विद्यालयमा अध्यापन गर्दै आएका थिए।
विद्यालयका अनुसार बिदापछि सोमबार विद्यालय खुले पनि दुवै शिक्षक सम्पर्कमा आएका थिएनन्। उनीहरू बस्ने कोठामा बाहिरबाट ताला लागेको र फोन पनि नउठेपछि खोजी गरिएको थियो। त्यसपछि रतन गुप्ताले प्रधानाध्यापकलाई वाट्सएपमा सन्देश पठाएर श्रीमती कोठाभित्र झुन्डिएको अवस्थामा भेटिएको र आफू डरका कारण त्यहाँबाट निस्किएको बताएका थिए।
स्थानीयका अनुसार रतन गुप्ता आइतबार साँझ दुईवटा झोला बोकेर विद्यालयबाट बाहिरिँदै गरेको देखिएका थिए र त्यसयता सम्पर्कमा छैनन्। प्रहरीले घटनास्थल पुगेर शवको मुचुल्का उठाएको छ भने घटनाबारे थप अनुसन्धान भइरहेको जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
