सङ्घीय संसद्का दुवै सदनको बैठक बस्दै

काठमाडौँ ।  सङ्घीय संसद्का प्रतिनिधिसभा र राष्ट्रियसभाको बैठक आज सोमबार बस्दैछ। प्रतिनिधिसभाको बैठक दिउँसो १ बजे सिंहदरबारमा सुरु हुनेछ। बैठकमा खानी तथा खनिज पदार्थसम्बन्धी विधेयकमाथि छलफल गर्ने प्रस्ताव पेस हुनेछ। महिला, बालबालिका तथा सामाजिक सुरक्षामन्त्री सीता बादीले बालबालिकासम्बन्धी र मानव बेचबिखन नियन्त्रणसम्बन्धी संशोधन विधेयक अघि बढाउनेछिन्। परराष्ट्रमन्त्री शिशिर खनालले राहदानीसम्बन्धी संशोधन विधेयकमाथि छलफल गर्ने प्रस्ताव राख्नेछन्।

यस्तै, राष्ट्रियसभाको बैठक दिउँसो १ः१५ बजे बस्नेछ। बैठकमा कृषि, वन तथा पर्यावरणमन्त्री गिता चौधरीले सङ्क्रामक पशु रोग नियन्त्रणसम्बन्धी विधेयकलाई थप छलफल र संशोधनका लागि विधायन व्यवस्थापन समितिमा पठाउने प्रस्ताव प्रस्तुत गर्नेछिन्। दुवै सदनका बैठकमा यी विधेयकमाथि छलफल र आवश्यक प्रक्रिया अघि बढाउने तयारी छ। विधेयक पारित भएपछि सम्बन्धित क्षेत्रमा नयाँ कानुनी व्यवस्था लागू हुने बाटो खुल्नेछ।