अधिक तरलता नियन्त्रण गर्न एक खर्ब निक्षेप सङ्कलन गर्दै केन्द्रीय बैंक

काठमाडौँ ।  नेपाल राष्ट्र बैंकले बजारमा धेरै भएको नगद (अधिक तरलता) नियन्त्रण गर्न आज १ खर्ब रुपैयाँ बैंक तथा वित्तीय संस्थाबाट ८३ दिनका लागि तान्ने भएको छ। यसका लागि राष्ट्र बैंकले निक्षेप सङ्कलन उपकरणमार्फत बोलकबोल आह्वान गरेको हो। बोलकबोल आज दिउँसो ३ बजेसम्म अनलाइन प्रणालीबाट हुनेछ। यसमा केवल राष्ट्र बैंकबाट अनुमति प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाले मात्र सहभागी हुन पाउनेछन्। न्यूनतम १० करोड रुपैयाँदेखि आवेदन दिन सकिनेछ र एउटै संस्थाले फरक–फरक ब्याजदरमा धेरै प्रस्ताव पनि पेश गर्न सक्नेछ।

ब्याजदर प्रतिस्पर्धात्मक बोलकबोलबाट तय हुनेछ, जसमा सबैभन्दा कम ब्याजदर प्रस्ताव गर्ने संस्थालाई प्राथमिकता दिइनेछ। साँवा र ब्याज २०८३ असोज २७ गते फिर्ता गरिनेछ। यो व्यवस्था बजारमा रहेको अतिरिक्त पैसा व्यवस्थापन गरी वित्तीय प्रणालीमा सन्तुलन कायम राख्न गरिएको हो। यसमा राखिएको रकम सीआरआरमा गणना नहुने भए पनि एसएलआर र तरलता अनुपातमा भने गणना गर्न सकिनेछ। साथै, अवधि सकिनुअघि रकम फिर्ता लिन पाइने छैन।