सुनाइमा समस्या भएका बिरामीहरूका लागि पहुँचयोग्य सञ्चार सहायता परियोजनाको समापन

काठमाडौं,  – सुनाइमा समस्या भएका (हार्ड अफ हियरिङ – HOH) बिरामीहरूका लागि पहुँचयोग्य सञ्चार सहायता परियोजनाको समापन कार्यक्रम त्रिभुवन विश्वविद्यालय शिक्षण अस्पताल (टियुथी), महाराजगञ्जस्थित सुरेश वाग्ले हलमा सम्पन्न भयो।

SHRUTI, TUTH र ZENNANCHO द्वारा संयुक्त रूपमा आयोजना गरिएको यो कार्यक्रममा परियोजनाको उपलब्धि र आगामी योजना सार्वजनिक गरियो।

कार्यक्रम SHRUTI की महासचिव कोपिला हुमागाईंको स्वागत मन्तव्यबाट सुरु भयो, जहाँ उनले परियोजनाका उद्देश्य र यसको महत्वलाई प्रस्ट्याइन्। SHRUTI की अध्यक्ष नीताकेशरी भट्टराईले परियोजनाको परिचय, उपलब्धि, र दीर्घकालीन रणनीतिबारे प्रस्तुति दिइन्।

ENT-HNS का सह-प्राध्यापक डा. रवीन्द्र प्रधानांगले अस्पतालमा सञ्चार सहायता कार्यान्वयनबारे जानकारी दिए। ZENNANCHO का युमिको मिनामीले जापानमा भएका सहकार्य अभ्यासबारे प्रकाश पारिन्।

स्वास्थ्य विभागका नारायण शर्माले अपाङ्गता भएका व्यक्तिहरू, विशेष गरी सुनाइमा समस्या भएका बिरामीहरूको लागि समावेशी स्वास्थ्य सेवा सुनिश्चित गर्न कानुनी व्यवस्था र नीति योजना प्रस्तुत गरे।

कार्यक्रमको मुख्य आकर्षण परियोजनाको लागि तयार गरिएको “इयरमार्क” प्रतीक र मार्गदर्शन पुस्तिकाको अनावरण थियो। यी सामग्री सहभागी बिरामीहरूलाई हस्तान्तरण गरियो। कार्यक्रममा नागरिक सेवा अस्पतालका डा. दिपेश शाक्य, किस्ट मेडिकल कलेजकी एमडी ईएनटी सर्जन डा. संगीता रेग्मी (चलिसे), र राष्ट्रिय अपाङ्ग महासंघ नेपालकी उपाध्यक्ष अनिता घिमिरेजस्ता प्रतिष्ठित व्यक्तिहरूले आफ्ना धारणा राखे।

घिमिरेले परियोजनाको प्रशंसा गर्दै अन्य स्वास्थ्य संस्थाहरूमा यसको विस्तारको आवश्यकता औंल्याइन्। विशेष अतिथि JICA नेपाल कार्यालयका प्रमुख प्रतिनिधि श्री मत्सुजाकीले परियोजनाको प्रशंसा गर्दै यसले नेपालमा स्वास्थ्य सेवा पहुँचमा ल्याउन सक्ने सकारात्मक प्रभावको चर्चा गरे।

प्रमुख अतिथि संघीय संसदकी उपसभामुख माननीय इन्दिरा राना मगरले परियोजनामा भएको सहकार्यको सराहना गर्दै समावेशी नीतिको महत्वमा जोड दिइन्।

कार्यक्रमका अन्तिम चरणमा TUTH का कार्यकारी निर्देशक प्रा. डा. घनश्याम गुरुङले स्वास्थ्य सेवामा समावेशिताको प्रवर्द्धनका लागि अस्पतालको प्रतिबद्धता दोहोर्‍याउँदै समापन मन्तव्य व्यक्त गरे।

SHRUTI का उपाध्यक्ष दिवाकर देवकोटाले धन्यवाद ज्ञापन गर्दै सबै सहभागी र सहयोगी संस्थाहरूलाई आभार व्यक्त गरे। समापनपछि समूह फोटो खिच्ने र खाजासहितको अन्तर्क्रिया कार्यक्रम आयोजना गरियो।

यस परियोजनाले सुनाइ समस्या भएका समुदायका लागि स्वास्थ्य सेवा समानताको दिशामा महत्त्वपूर्ण उपलब्धि हासिल गरेको छ। आगामी दिनमा यसलाई अझ व्यापक रूपमा लागू गर्न र सहकार्य विस्तार गर्न यो परियोजना आधार बन्ने विश्वास गरिएको छ।