काठमाडौं ।मौज्दात बढेपछि दुग्ध विकास संस्थान (डीडीसी) ले ६०० मेट्रिक टन दुग्ध पदार्थ मूल्य समायोजन गरेर बिक्री गर्ने तयारी गरेको छ।
किसानलाई भुक्तानी दिन समेत समस्या सिर्जना भएपछि संस्थानले मूल्य समायोजनमार्फत दुग्ध पदार्थको बिक्री बढाउन लागेको हो।
डीडीसीले आइतबार सार्वजनिक सूचना जारी गर्दै तीन सय मेट्रिक टन खुला मखन र तीन सय मेट्रिक टन स्किम्ड मिल्क पाउडर विक्रीका लागि प्रस्ताव आह्वान गरेको छ।
हाल डीडीसीसँग ८५० मेट्रिक टन मखन र ९०० मेट्रिक टन स्किम्ड मिल्क पाउडर मौज्दात रहेको डीडीसीका प्रबन्धक पशुपति ढुंगानाले जानकारी दिए।
उनका अनुसार मौज्दात अत्यधिक बढेपछि डीडीसीका सबै भण्डारण गृह भरिएका छन्। “उपत्यकाभित्र र बाहिर गरेर डीडीसीसँग कुल ४ हजार मेट्रिक टन मौज्दात क्षमता छ,” उनले भने, “भाडामा लिएका गोदामहरू समेत भरिएपछि मौज्दात चाँडो खाली गर्न मूल्य समायोजन गरेर बिक्री गर्न लागिएको हो।”
डीडीसीको सूचनाअनुसार इच्छुक व्यक्ति, कम्पनी तथा फर्महरूले सूचना प्रकाशित मितिले ७ दिनभित्र डीडीसी केन्द्रीय कार्यालय, लैनचौरमा प्रस्ताव पेश गर्न सक्नेछन्।
प्रस्ताव पेश गर्दा खरिद गर्न चाहेको दुग्ध पदार्थको परिमाण र मूल्य अभिवृद्धि कर (VAT) सहितको मूल्य उल्लेख गर्नुपर्ने सूचनामा उल्लेख गरिएको छ।
यदी खरिदकर्ताले दुग्ध पदार्थ निर्यात गर्न चाहेको खण्डमा, त्यसका लागि सम्बन्धित निकायमा सिफारिस डीडीसीले उपलब्ध गराउने जनाएको छ।
मौज्दात थुप्रिएपछि किसानलाई बक्यौता भुक्तानी दिन डीडीसीलाई समस्या भएको छ।
गत वर्ष पनि यस्तै परिस्थितिमा डीडीसीले दुग्ध पदार्थको मूल्य समायोजन गरेर विक्री गरेको थियो।
कृषि तथा पशुपन्छी विकास मन्त्री रामनाथ अधिकारीका अनुसार किसानले डीडीसीलाई उधारोमा बेचेको दूधबापत हालसम्म १ अर्ब रुपैयाँभन्दा बढी बक्यौता लिन बाँकी छ।
केन्द्रीय दुग्ध सहकारी संघका अनुसार किसानहरूले निजी क्षेत्रका डेरीहरूबाट करिब ४ अर्ब रुपैयाँ र डीडीसीबाट १ अर्ब रुपैयाँ बक्यौता लिन बाँकी रहेको छ।
मौज्दात बढेर समस्या भएपछि डीडीसीले नेपाली सेना, नेपाल प्रहरी र सशस्त्र प्रहरी बलमा दैनिक रूपमा दूध विक्रीको व्यवस्था मिलाइदिन सरकारसँग अनुरोध गरेको थियो।
तर, डीडीसीका सूचना अधिकारी निलकण्ठ गौतमका अनुसार सो अनुरोध अहिलेसम्म सुनुवाइमा आएको छैन।
कात्तिकदेखि चैतसम्मलाई फ्लस सिजन मानिन्छ। यो समयमा दूध उत्पादन बढी हुने भएकाले डेरी उद्योग र पाउडर प्लान्टहरूले संकलन पनि बढाउने गर्छन्।
तर, उत्पादन घट्ने बैशाखदेखि असोजसम्म (लिन सिजन) मा अघिल्लो वर्ष संकलन गरेर राखिएको दूध बजारमा उतार्ने चलन छ।
तर यसपटक लिन सिजनमै पनि अघिल्ला वर्षको तुलनामा करिब १० प्रतिशतसम्म दूध उत्पादन बढेकाले मौज्दात बढ्ने क्रम रोकिएको छैन, डेरी उद्योगीहरू बताउँछन्।
दुग्ध विकास संस्थान, केन्द्रीय कार्यालय, लैनचौरले संस्थानबाट उत्पादित खुल्ला मखन र स्किम्ड मिल्क पाउडर (धुलो दूध) बिक्रीका लागि इच्छुक फर्म, संस्था, कम्पनी वा व्यक्तिहरूबाट सिलबन्दी प्रस्ताव आह्वान गरेको छ।
संस्थानले कुल ३०० मेट्रिक टन खुल्ला मखन (१५ के.जी. ब्लक) र ३०० मेट्रिक टन स्किम्ड मिल्क पाउडर (२५ के.जी. ब्याग) बिक्री गर्ने जनाएको छ। इच्छुक पक्षले प्रति के.जी. मूल्य (मूल्य अभिवृद्धि करसहित) उल्लेख गरी प्रस्ताव पेश गर्नु पर्नेछ।
प्रस्ताव पेश गर्ने अन्तिम म्याद सूचना प्रकाशित मितिले ७ दिनभित्र अर्थात् २०८२ साल असार १ गते कार्यालय समयभित्र रहनेछ। प्रस्ताव दुग्ध विकास संस्थान, केन्द्रीय कार्यालय, लैनचौरमा पेश गर्नुपर्नेछ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
