बैंक तथा वित्तीय क्षेत्र सुधारमा छलफल, गभर्नर पौडेल आज अध्यक्षहरूसँग सोल्टी होटलमा

काठमाडौं, १४ साउन। नेपाल राष्ट्र बैंकका गभर्नर डा. विश्वनाथ पौडेलले वाणिज्य बैंकहरूका सञ्चालक समितिका अध्यक्षहरूसँग आज विशेष छलफल गर्दैछन्। सोल्टी होटलमा आयोजना हुने उक्त बैठकमा बैंक तथा वित्तीय क्षेत्रसम्बन्धी प्रमुख तीन एजेन्डा राखिएको छ।

गभर्नरको कार्यालयबाट अध्यक्षहरूलाई पठाइएको पत्रअनुसार छलफलमा प्रमुख विषयवस्तुहरूमा हालै जारी मौद्रिक नीतिको प्रभावकारिता, दोस्रो वित्तीय क्षेत्र विकास रणनीति र बैंक तथा वित्तीय संस्था सम्बन्धी ऐन (बाफिया) को प्रस्तावित संशोधन समेटिएको छ।

यसअघि मंगलबार वाणिज्य बैंकका प्रमुख कार्यकारी अधिकृतहरूसँग छलफल गरिसकेका गभर्नर पौडेलले बाफिया विधेयकको प्रभाव र व्यावसायिक पक्षबारे छलफल गर्दै बैंकिङ्ग प्रणालीलाई थप पारदर्शी र उत्तरदायी बनाउने उद्देश्य प्रस्तुत गरेका थिए।

बाफिया संशोधन विधेयक प्रतिनिधिसभा अन्तर्गतको अर्थ समितिमा छलफलरत छ। उक्त प्रस्तावमा बैंकर र व्यवसायीलाई छुट्टयाउने उद्देश्यले उल्लेख्य स्वामित्वको सीमा हालको २ प्रतिशतबाट घटाएर १ प्रतिशत बनाउने र यस्ता स्वामित्वधारीले व्यवसायिक ऋण लिन नपाउने व्यवस्था राखिएको छ। साथै, सम्बद्ध व्यक्तिको परिभाषालाई समेत विस्तारित गर्ने प्रस्ताव गरिएको छ।

मंगलबारको बैठकमा बैंक प्रतिनिधिहरुले लगानीकर्तालाई उपयुक्त ‘एक्जिट पोलिसी’ सुनिश्चित गर्नुपर्नेमा जोड दिएका थिए। बैंकिङ्ग प्रणालीबाट बाहिरिन चाहने लगानीकर्ताका लागि सुरक्षित निकास मार्गको व्यवस्था स्पष्ट नभएको भन्दै उनीहरूले गुनासो व्यक्त गरेका थिए।

छलफलमा सहभागी गभर्नर पौडेलले पनि ‘एक्जिट पोलिसी’का सम्बन्धमा आफू र अर्थमन्त्री दुवै सकारात्मक रहेको बताएका छन्। तर उक्त नीति कार्यान्वयनका लागि समय र सहजीकरण आवश्यक रहेको उनको भनाइ छ।

बैंक तथा वित्तीय क्षेत्रको सुधार, दीर्घकालीन रणनीति निर्माण र विधेयकमार्फत आवश्यक सन्तुलन कायम गर्न गभर्नरको पहल व्यापक बहसको विषय बनेको छ। आजको बैठकले आगामी नीतिगत निर्णयहरूमा सघन प्रभाव पार्ने अपेक्षा गरिएको छ।