उज्बेकिस्तानको विश्वविद्यालयमा नेपाली डिन किशन भण्डारी,दुई नेपाली विद्यार्थीका लागि सुरु गरे छात्रवृत्ति

काठमाडौँ । डा. किसन भण्डारी अनुभवी नेपाली चिकित्सक तथा शिक्षाविद् हुन्, जो लामो समयदेखि सेन्ट्रल एसियाली क्षेत्रमा चिकित्सा शिक्षा र नेपाली समुदायको हितमा सक्रिय छन्। हाल उनी उज्बेकिस्तानको बुखारास्थित एसिया इन्टरनेसनल युनिभर्सिटीमा डिनको जिम्मेवारी सम्हाल्दै अन्तर्राष्ट्रियस्तरको चिकित्सा शिक्षा प्रवर्द्धनमा संलग्न छन्। मस्कोबाट एमबीबीएस अध्ययन पूरा गरेका डा. भण्डारीले किर्गिस्तानबाट न्युरो सर्जरीमा स्नातकोत्तर तथा जनस्वास्थ्यमा मास्टर्स डिग्री हासिल गरेका छन्। किर्गिस्तानमा करिब एक दशकसम्म भाइस डिनका रूपमा सेवा दिएका उनले चिकित्सा शिक्षा सुधार, विद्यार्थी हित र संस्थागत विकासमा उल्लेखनीय योगदान पुर्‍याएका छन्।

गैरआवासीय नेपाली संघ किर्गिस्तानका पूर्व अध्यक्षसमेत रहेका डा. भण्डारी सेन्ट्रल एसियामा अध्ययनरत नेपाली विद्यार्थी र कार्यरत श्रमिकहरूका लागि अभिभावकजस्तै व्यक्तित्वका रूपमा परिचित छन्। उज्बेकिस्तान, किर्गिस्तान र काजाकिस्तानमा रहेका नेपालीहरूको समस्यामा दूतावाससँग समन्वय, उद्धार प्रयास र सचेतना अभिवृद्धिमा उनी निरन्तर सक्रिय रहँदै आएका छन्। नेपाल र सेन्ट्रल एसियाबीच शैक्षिक पुलको रूपमा काम गर्दै आएका डा. भण्डारी सस्तो, गुणस्तरीय र विश्वसनीय चिकित्सा शिक्षामा नेपाली विद्यार्थीहरूको पहुँच विस्तार गर्न प्रतिबद्ध रहेको बताउँछन्।

उज्बेकिस्तानमा एमबीबीएस अध्ययनबारे गरिएको संवादमा डा. भण्डारीले यहाँको चिकित्सा शिक्षा नेपालभन्दा किफायती र व्यवस्थित रहेको जानकारी दिए। उनका अनुसार एमबीबीएसको अध्ययन अवधि ६ वर्षको हुन्छ, जसमा ५ वर्ष अध्ययन र १ वर्ष अनिवार्य इन्टर्नसिप समावेश छ। एसिया इन्टरनेसनल युनिभर्सिटीमा ६ वर्षको कुल ट्युसन शुल्क करिब २१ लाख रुपैयाँ रहेको छ, जुन नेपालमा लाग्ने शुल्कभन्दा निकै कम हो। शिक्षण माध्यम अंग्रेजी भाषा भए पनि स्थानीय बिरामीसँग प्रभावकारी संवादका लागि उज्बेक भाषा अनिवार्य रूपमा पढाइन्छ। क्लिनिकल साइकल प्रणाली, पर्याप्त अस्पताल पहुँच, अन्तर्राष्ट्रिय प्राध्यापक टोली र कडा शैक्षिक मापदण्डका कारण उज्बेकिस्तान चिकित्सा शिक्षा अध्ययनका लागि आकर्षक गन्तव्य बन्दै गएको डा. भण्डारीको भनाइ छ।

शैक्षिक नेतृत्वसँगै सामाजिक उत्तरदायित्वलाई पनि प्राथमिकता दिँदै भण्डारीले यस वर्षदेखि विश्वविद्यालयमा दुई जना नेपाली विद्यार्थीका लागि छात्रवृत्ति कार्यक्रम सुरु गराएका छन्। उनको यो पहलले अन्तर्राष्ट्रिय शिक्षामा नेपाली विद्यार्थीको पहुँच विस्तार गर्न सहयोग पुग्ने विश्वास गरिएको छ।