अर्थमन्त्री वाग्ले तीन दिने भारत भ्रमणमा प्रस्थान

काठमाडौँ । अर्थमन्त्री डा. स्वर्णिम वाग्ले तीन दिने औपचारिक भ्रमणका लागि बिहीबार बिहान भारत प्रस्थान गरेका छन्। भारत सरकारको निमन्त्रणामा मन्त्री वाग्ले बिहान ७ः३५ बजेको उडानमार्फत नयाँदिल्ली प्रस्थान गरेका हुन्।

भ्रमणका क्रममा नेपालमा विपद्पछिको पुनर्निर्माण तथा नेपाल–भारतबीचको आर्थिक, राजनीतिक र कूटनीतिक सहकार्यका विविध विषयमा छलफल हुने जनाइएको छ।

भारत भ्रमणका क्रममा अर्थमन्त्री वाग्लेले भारतीय अर्थमन्त्री निर्मला सीतारमण र विदेशमन्त्री डा. एस. जयशंकरसँग उच्चस्तरीय भेटवार्ता गर्ने कार्यक्रम रहेको छ। भेटवार्तामा द्विपक्षीय आर्थिक सम्बन्ध तथा आपसी सहकार्यका विषयमा छलफल हुने अपेक्षा गरिएको छ।

त्यसैगरी, वाग्लेले भारतका पूर्वविदेशसचिव श्याम शरणले आयोजना गर्ने कूटनीतिक संवादमा सहभागी हुनेछन्। उनले भारत व्यापार संवर्धन सङ्गठन तथा भारतीय उद्योग परिसंघका कार्यक्रमहरूमा समेत सहभागिता जनाउँदै भारतीय उद्योग तथा व्यावसायिक क्षेत्रका प्रतिनिधिसँग छलफल गर्ने कार्यक्रम छ।

भ्रमणको अन्तिम दिन शनिबार मन्त्री वाग्ले दिल्ली स्कुल अफ इकोनोमिक्समा आयोजना हुने विकास अर्थनीतिसम्बन्धी प्राज्ञिक छलफलमा प्रमुख अतिथिका रूपमा सहभागी हुनेछन्। त्यसपछि उनी शनिबार साँझ ४ बजे स्वदेश फर्किने कार्यक्रम रहेको छ।

अर्थमन्त्री वाग्लेको नेतृत्वमा भारत भ्रमणमा अर्थ मन्त्रालयका सहसचिव अमृत लम्साल, परराष्ट्र मन्त्रालयका सहसचिव गेहेन्द्र राजभण्डारी, नयाँदिल्लीस्थित नेपाली राजदूतावासका उपनियोग प्रमुख डा. सुरेन्द्र थापा, इकोनोमिक्स मिनिस्टर तारानाथ अधिकारी र निजी उपसचिव कञ्चन बस्नेत सहभागी छन्।