हेटौंडा, बागमती —खाद्य प्रविधि तथा गुण नियन्त्रण कार्यालय, हेटौँडाले हालै ४७ जना व्यवसायीविरुद्ध मुद्दा दायर गरेको छ। कार्यालयले चालु आर्थिक वर्ष २०८१/८२ मा विभिन्न बजार अनुगमनका क्रममा संकलित खाद्य तथा दाना नमूनाको परीक्षणबाट मापदण्ड विपरीत देखिएको आधारमा ती व्यवसायीमाथि कानुनी प्रक्रिया अघि बढाएको हो।
कार्यालय प्रमुख काशीनाथ घिमिरेका अनुसार, तीन व्यवसायीमाथि खाद्य स्वच्छता तथा गुणस्तर ऐन अन्तर्गत मुद्दा दायर गरिएको छ। अघिल्लो आर्थिक वर्ष २०८०/८१ मा ४४ जनाविरुद्ध मुद्दा दायर गरिएको थियो।
अनुगमनका क्रममा स्वास्थ्यमा प्रतिकूल असर पार्ने मिसावट, म्याद गुज्रेका वस्तुहरूको बिक्री, लेबल विवरण नभएका वस्तुहरू लगायतका गम्भीर लापरवाही भेटिएपछि सम्बन्धित जिल्ला अदालतहरूमा मुद्दा दायर गरिएको हो।
कार्यालयले चालु आर्थिक वर्षमा निम्न कार्यहरू सम्पन्न गरेको छ:
खाद्य अनुज्ञापत्र (सिफारिस, जारी, नविकरण): ४८३ वटा
दाना अनुज्ञापत्र (सिफारिस, जारी, नविकरण): १८ वटा
खाद्य तथा दाना नमूना संकलन: ९० वटा
स्वच्छता सर्भेक्षणका लागि नमूना संकलन: १८३ वटा
परीक्षण गर्दा ८५ वटा नमूना प्रतिकूल देखिएपछि नियमनअनुसार कानुनी कारबाही, पुनः परीक्षण तथा सुधार गराउने कार्यहरू अगाडि बढाइएको घिमिरेले जानकारी दिए।
अनुगमन तथा अदालतको फैसलाअनुसार रु ११ लाख ३३ हजार बराबरका अखाद्य वस्तुहरू नष्ट गरिएको कार्यालयले जनाएको छ। नष्ट गरिएका वस्तुहरूमा उपभोग्य अवधि समाप्त भएका, सडेगलेका तथा लेबल विवरण नपुगेका वस्तुहरू रहेका थिए।
सौराहा चितवन लगायतका क्षेत्रमा सञ्चालित १३ वटा होटल तथा रेष्टुरेन्टलाई स्तरिकरण प्रमाणपत्र र लोगो वितरण गरिएको छ। यस क्रममा जनप्रतिनिधि, व्यवसायी तथा सञ्चारकर्मीहरूको उपस्थिति रहेको थियो।
खाद्य स्वच्छता प्रवर्द्धन गर्ने उद्देश्यले कार्यालयले जेठ १८ देखि २४ गतेसम्म विभिन्न कार्यक्रमसहित विश्व खाद्य स्वच्छता सप्ताह मनाएको जानकारी दिइएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
