सहसचिवदेखि प्रभु बैंकको अध्यक्षसम्म : किशोर जंग कार्की

काठमाडौँ । प्रभु बैंक लिमिटेडको सञ्चालक समितिको अध्यक्षमा किशोर जंग कार्की चयन भएका छन्। बिहीबार सम्पन्न बैंक सञ्चालक समितिको ३८०औं बैठकले कार्कीलाई सर्वसम्मत अध्यक्ष चयन गरेको हो।

ओखलढुंगा निवासी कार्कीले जन प्रशासनमा स्नातकोत्तर गरेका छन्। लामो समय नेपाल सरकारको सहसचिवका रूपमा विभिन्न निकायहरूमा कार्यरत रहेर सेवा गरिसकेका कार्की आन्तरिक राजस्व विभाग, अख्तियार दुरुपयोग अनुसन्धान आयोग र अर्थ मन्त्रालयजस्ता महत्वपूर्ण सरकारी निकायहरूमा समेत काम गरिसकेका अनुभवी ब्यक्तित्व हुन्। सरकारी सेवाबाट अवकाश प्राप्त कार्कीले अब बैंकिङ क्षेत्रमा नेतृत्व सम्हाल्ने अवसर पाएका छन्।

बैठकले स्वतन्त्र सञ्चालकका रूपमा रमेश राज अर्याललाई पनि मनोनयन गरेको छ। बैंकिङ क्षेत्रमा लामो अनुभव बोकेका अर्यालले एनसीसी बैंक र कुमारी बैंकका प्रमुख कार्यकारी अधिकृत (सीईओ) का रूपमा काम गरिसकेका छन्। उनी बिहीबारदेखि नै प्रभु बैंकका स्वतन्त्र विज्ञ सञ्चालकका रूपमा नियुक्त भएका छन्।

प्रभु बैंकको सञ्चालक समितिमा कार्की अध्यक्ष रहेका छन् भने संस्थापक सेयरधनीका प्रतिनिधिका रूपमा अंगिर मान सिंह, बिर्ख बहादुर बस्नेत र अम्बिका शर्मा रहेका छन्। त्यस्तै, सर्वसाधारण सेयरधनीहरूबाट सुरज कुमार श्रेष्ठ र राजु पौडेल सञ्चालकका रूपमा समिति सदस्य छन्।

नयाँ नेतृत्वसँगै प्रभु बैंकले आफ्नो संस्थागत विकास र वित्तीय सुदृढीकरणमा थप गति लिने अपेक्षा गरिएको छ।