कम्बोडिया–थाइल्याण्डबीच गोलीबारी, सीमामा द्वन्द्व र दूतावास फिर्ता

बैंकक,  (एजेन्सी) । दक्षिणपूर्वी एसियाली छिमेकी देश थाइल्याण्ड र कम्बोडियाबीचको सीमा तनाव चरम अवस्थामा पुगेको छ। विगत केही सातादेखि जारी विवादित सीमावर्ती क्षेत्रमा बिहीबार दुवै देशका सेनाबीच गोलीबारी हुँदा कम्तीमा दुई जनाको मृत्यु भएको छ भने थाई सेनाका दुई सैनिक घाइते भएका छन्।

थाई सेनाका उपप्रवक्ता कर्नल रिचा सुक्सुवानोन्टले कम्बोडियाली सेनाले BM21 रकेट लन्चरसहित विभिन्न आधुनिक हतियार प्रयोग गरेको आरोप लगाएका छन्। उनका अनुसार गोलीबारी प्राचीन प्रसात ता मुएन थोम मन्दिर नजिकैको सीमावर्ती क्षेत्रमा भएको हो, जुन थाईल्याण्डको सुरिन र कम्बोडियाको ओड्डार मिन्चे प्रान्तको सिमानामा पर्छ।

घटना लगत्तै सीमावर्ती बस्तीहरूमा भयको वातावरण सिर्जना भएको छ। थाई सञ्चारमाध्यममा सार्वजनिक गरिएको लाइभ भिडियोमा स्थानीय बासिन्दाहरू विस्फोटको आवाजसँगै घर छोड्दै कंक्रीट बंकरहरूमा आश्रय लिइरहेको देखिन्छ।

दुवै देशले एकअर्कामाथि झडप सुरु गरेको आरोप लगाएका छन्। थाई अधिकारीहरूले कम्बोडियाली सेनाले अग्रसरता लिएको दाबी गरेका छन् भने कम्बोडियाले थाइल्याण्डलाई आक्रमणको दोष लगाएको छ।

सैन्य झडपसँगै दुई देशबीचको कूटनीतिक सम्बन्ध पनि थप चिसिएको छ। कम्बोडियाले हालै बैंककस्थित आफ्नो दूतावासका सबै कर्मचारी फिर्ता बोलाउने निर्णय लिएको थियो। यो निर्णय थाई सरकारले उत्तरपूर्वी सीमा चौकीहरू बन्द गर्ने, आफ्नो राजदूत फिर्ता बोलाउने र कम्बोडियाली राजदूतलाई निष्कासित गर्ने निर्णयको विरोधमा आएको हो। उक्त निर्णय थाई सैनिक पाँच जना बारुदी सुरुङ विष्फोटमा घाइते भएपछि लिइएको बताइएको छ।

थाइल्याण्ड–कम्बोडिया सम्बन्ध पछिल्लो केही महिनादेखि लगातार तनावग्रस्त बन्दै गएको छ। विशेषगरी मे महिनामा भएको सीमा झडपमा एक कम्बोडियाली सैनिकको मृत्यु भएपछि सम्बन्धमा चिसोपन गहिरिँदै गएको हो।

सीमा विवादको केन्द्रमा रहेको ऐतिहासिक मन्दिर क्षेत्र विगतमा पनि दुवै देशबीचको विवादको केन्द्र रहँदै आएको थियो। यद्यपि पछिल्ला झडप र कूटनीतिक निर्णयहरूले द्विपक्षीय सम्बन्ध गम्भीर संकटमा परेको छ।