इन्टरनेसनल एजुकेसन शोकेस १.०’ सम्पन्न

काठमाडौं, २८ पौष २०८१ – एजुकेसन म्याटर्स को आयोजनामा शिक्षा मेला ‘इन्टरनेसनल एजुकेसन शोकेस १.०’ काठमाडौंको बागबजारस्थित होटल हार्दिक बिल्डिङमा भव्य रूपमा सम्पन्न भएको छ। बिहान ११:०० देखि अपराह्न ४:०० सम्म चलेको यस कार्यक्रममा बेलायत, अमेरिका, क्यानडा, अष्ट्रेलिया, न्युजिल्यान्ड र युरोपका प्रतिष्ठित विश्वविद्यालय तथा शैक्षिक संस्थाका प्रतिनिधिहरूले सहभागिता जनाएका थिए।

कार्यक्रमको उद्घाटन नेपाल शैक्षिक परामर्श संघ (ईक्यान) का अध्यक्ष शेषराज भट्टराईले गरेका थिए। साथै ईक्यानका महासचिव दीपक भुसालसहित अन्य कार्यकारी पदाधिकारीहरूले कार्यक्रममा सक्रिय उपस्थिति जनाएका थिए।

पिअर्सन पीटीईका नेपाल र भूटान प्रतिनिधि सुमन श्रेष्ठले कार्यक्रममा पिअर्सन पीटीईको महत्त्व र यसले विद्यार्थीहरूको भाषा दक्षताको मूल्याङ्कनमा दिने अवसरबारे जानकारी गराएका थिए। उनले नेपाली विद्यार्थीहरूले यस अवसरलाई सही रूपमा उपयोग गरी आफूलाई अगाडि बढाउनुपर्नेमा जोड दिएका थिए।

ब्रिट्स इम्पेरियल युनिभर्सिटी कलेज, दुबईका वरिष्ठ व्यवसाय विकास प्रबन्धक तरुण जेतवानीले नवप्रवर्तन र उद्यमशीलताको क्षेत्रमा अन्तर्राष्ट्रिय विद्यार्थीहरूको लागि उपलब्ध अवसरहरूको चर्चा गरेका थिए। उनले यस कार्यक्रमले विद्यार्थीहरूसँग प्रत्यक्ष संवाद गर्न पाएकोमा खुशी व्यक्त गरेका थिए।

अपग्र्याड जीएसपीका व्यवसाय विकास प्रबन्धक राहुल थापाले अनलाइन र हाइब्रिड शिक्षा प्रणालीमार्फत अन्तर्राष्ट्रिय स्तरको शिक्षा उपलब्ध गराउने उद्देश्यबारे जानकारी गराएका थिए। कन्कर्डिया युनिभर्सिटी शिकागो र हर्जिङ युनिभर्सिटी एटलान्टाका प्रतिनिधि निशा भट्टराईले यी विश्वविद्यालयहरूले प्रदान गर्ने कोर्सहरू र छात्रवृत्ति अवसरहरूबारे विवरण प्रस्तुत गरेकी थिइन्।

एनएपीएसकी मार्केटिङ प्रबन्धक गीता राजबाहकले नेपाली विद्यार्थीहरूको शैक्षिक तथा व्यावसायिक विकासमा आफ्नो संस्थाले खेलेको भूमिकाबारे चर्चा गरेकी थिइन्। ह्युस्टन-टिलोट्सन युनिभर्सिटी, टेक्सासकी प्रतिनिधि मेलिना पाण्डेले आफ्नो विश्वविद्यालयको ऐतिहासिक पृष्ठभूमि र अन्तर्राष्ट्रिय विद्यार्थीहरूको लागि उपलब्ध अवसरहरूबारे जानकारी गराएकी थिइन्।

पार्क युनिभर्सिटी, अमेरिकाका दक्षिण एसिया प्रतिनिधि दिनेश अलवानीले पार्क युनिभर्सिटीले प्रदान गर्ने व्यावसायिक तथा शैक्षिक अवसरहरूबारे विस्तृत जानकारी दिएका थिए। युनिभर्सिटी क्यानडा वेस्टका प्रतिनिधि नेत्र कोइरालाले क्यानडामा अध्ययनका अवसरहरूबारे आफ्नो अनुभव साझा गरेका थिए।

एजुकेसन म्याटर्सका प्रबन्ध निर्देशक डा. द्रज धितालले कार्यक्रमको समापनमा सहभागी सम्पूर्ण प्रतिनिधिहरूलाई धन्यवाद ज्ञापन गर्दै यस शिक्षा मेलाले नेपाली विद्यार्थीहरूलाई विश्वस्तरीय शैक्षिक अवसरहरूको पहुँच सहज बनाउने काम गरेको बताएका थिए।

‘इन्टरनेसनल एजुकेसन शोकेस १.०’ नेपाली विद्यार्थीहरूका लागि अन्तर्राष्ट्रिय विश्वविद्यालयहरूसँग प्रत्यक्ष रूपमा जोडिन र आफ्नो उज्ज्वल भविष्य निर्माण गर्न महत्वपूर्ण मञ्च बनेको थियो। कार्यक्रममा सहभागी प्रतिनिधिहरूले विद्यार्थीहरूलाई शिक्षा सम्बन्धी सम्पूर्ण जानकारी दिँदै उनीहरूको निर्णय क्षमतामा सुधार ल्याउन सहयोग गरेका थिए।