काठमाडौं । कामना सेवा विकास बैंक लिमिटेडले रसुवाको भोटेकोशी नदीमा भदौ १० गते आएको बाढीबाट प्रभावित नागरिकको उद्धार, राहत तथा पुनःस्थापनाका लागि २५ लाख रुपैयाँ आर्थिक सहयोग गरेको छ।
बैंकले आफ्नो संस्थागत सामाजिक उत्तरदायित्वअन्तर्गत १० लाख रुपैयाँ र बैंकमा कार्यरत कर्मचारीको एक दिनको तलबबाट १५ लाख रुपैयाँ गरी कुल २५ लाख रुपैयाँ सहयोग गरेको जनाएको छ। बैंक सञ्चालक समितिको निर्णयअनुसार उपलब्ध गराइएको उक्त रकम प्रधानमन्त्री दैवी प्रकोप उद्धार कोषमा जम्मा गरिएको बैंकले जनाएको छ।
बाढीबाट प्रभावित परिवार तथा समुदायको तत्कालीन आवश्यकता सम्बोधन गर्न र उद्धार तथा राहत कार्यमा सहयोग पुर्याउने उद्देश्यले सहयोग रकम उपलब्ध गराइएको बैंकले जनाएको छ। प्राकृतिक विपद्का कारण प्रभावित नागरिकलाई आवश्यक राहत तथा पुनःस्थापनामा उक्त सहयोगले योगदान पुर्याउने विश्वास बैंकले व्यक्त गरेको छ।
बैंकले संस्थागत सामाजिक उत्तरदायित्वअन्तर्गत यसअघि पनि विपद्ब प्रभावित समुदाय, मानवीय सहायता तथा सामाजिक हितका विभिन्न क्षेत्रमा सहयोग गर्दै आएको जनाएको छ। आगामी दिनमा पनि सामाजिक उत्तरदायित्वअन्तर्गत आवश्यक सहयोगलाई निरन्तरता दिने बैंकको भनाइ छ।
यसैबीच, बैंकले रसुवा बाढीमा परी ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको छ। बाढीमा घाइते भएकाहरूको शीघ्र स्वास्थ्यलाभको कामना गर्दै प्रभावित सबै नागरिकको सुरक्षित तथा सहज जीवनयापनका लागि बैंकले शुभेच्छा व्यक्त गरेको छ।
बाढीपछि उद्धार, राहत तथा व्यवस्थापनमा सक्रिय रूपमा खटिएका सुरक्षाकर्मी, सरकारी तथा गैरसरकारी निकाय, स्थानीय तह, स्वयंसेवक र सहयोगी सबैप्रति बैंकले कृतज्ञता व्यक्त गरेको छ।
प्राकृतिक विपद्को कठिन परिस्थितिमा प्रभावित समुदायलाई राहत तथा पुनःस्थापनामा सहयोग पुर्याउन सबै पक्षबीच समन्वय, सहकार्य र मानवीय सहयोग आवश्यक रहेको उल्लेख गर्दै बैंकले सम्बन्धित सबै सरोकारवालालाई विपद् प्रभावितको सहयोगमा जुट्नसमेत आह्वान गरेको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
