इतिहासबाट सिकौं , देश विकासका लागि गुटबन्दी होइन, एकता चाहिँन्छ: शिक्षामन्त्री महावीर पुन

काठमाडौँ । शिक्षामन्त्री महावीर पुनले जेनजी पुस्तालाई गुटबन्दी र खुट्टा तानातान नगरी राष्ट्रिय हितमा एकजुट हुन आग्रह गरेका छन्। सामाजिक सञ्जालमार्फत उनले देश विकास र सार्वभौमसत्ता जोगाउनका लागि ६ बुँदामा सन्देश दिएका हुन्।

उनका अनुसार गुटबन्दी र खुट्टा तानातानले देशलाई फाइदा नभई झन ठूलो नोक्सान गर्छ। उनले इतिहासका विभिन्न चरणको उदाहरण दिँदै यस्तो प्रवृत्तिले सधैं देशलाई कमजोर बनाएको बताए।

उनी भन्छन्– नाबालक राजा रणबहादुर शाहको पालादेखि सुरु भएको गुटबन्दीले अन्ततः राणातन्त्र जन्मायो, जसका कारण जनताले १०४ वर्षसम्म निरङ्कुश शासन सहनुपर्‍यो। राणा शासनमै पनि गुटबन्दी भयो र अन्ततः जनआन्दोलनबाट ढल्यो। त्यसपछि पनि २०१५ सालसम्म संसद् निर्वाचन ढिलाइ हुनु, २०४६ सालमा पञ्चायत पतन हुनु र पछिल्लो जेनजी आन्दोलनसम्म पुग्नु, सबैमा गुटबन्दी र आन्तरिक लडाइँ प्रमुख कारण भएको उनले बताए।

पुनले भने, “जेनजी तपाईँहरूको राजनीतिक संगठन छैन, तर तपाईँहरूमा सुशासन ल्याउने र भ्रष्टाचार अन्त्य गर्ने ठुलो चाहना छ। तर गुटबन्दी बढे भने सपना अधुरो हुन्छ।”

उनले जेनजीलाई इतिहासबाट सिक्न, आन्तरिक फुट नगरी एक भएर देशलाई समृद्ध बनाउन एकताको खाँचो तत्काल देखिएको बताए।