कोरियामा सीप र भाषा जान्ने नेपाली श्रमिकलाई ई–७ भिसामार्फत रोजगारीको अवसर

काठमाडौं । नेपालका सीप र भाषा जान्ने श्रमिकहरूले अब कोरियामा मेनपावरमार्फतै रोजगारी पाउने अवसर प्राप्त गरेका छन्।श्रम, रोजगार तथा सामाजिक सुरक्षा मन्त्रालय, कानून, न्याय तथा संसदीय मामिला मन्त्रालय र परराष्ट्र मन्त्रालयले संयुक्त रूपमा ‘गणतन्त्र कोरियामा सीपयुक्त श्रमिक पठाउने कार्यविधि २०८०’ लाई तेस्रो पटक संशोधन गर्दै ई–७ भिसा कार्यक्रममार्फत नेपाली कामदार पठाउने प्रक्रिया सुरु गरेका हुन्।

यो भिसा विशेषगरी व्यवस्थापन, इन्जिनियरिङ, स्वास्थ्य, पर्यटन, कृषि र निर्माणजस्ता क्षेत्रमा सीप र भाषा जान्ने दक्ष कामदारका लागि लक्षित गरिएको छ। मेनपावर कम्पनीहरूले बीटुबी (Business-to-Business) प्रकृतिमा कोरियाली कम्पनीसँग प्रत्यक्ष सम्झौता गरेर मात्र कामदार पठाउन सक्ने व्यवस्था गरिएको छ। आवेदन प्रक्रिया भने दूतावासमार्फत प्रमाणीकरण हुने स्पष्ट गरिएको छ।

ई–७ भिसा प्रणाली ईपीएस अन्तर्गतको ई–९ भिसाभन्दा फरक छ। ई–७ भिसामा प्रारम्भमा १ वर्षको अवधि दिइनेछ, जसलाई आवश्यकताअनुसार ५ वर्षसम्म विस्तार गर्न सकिनेछ। मन्त्रालयका अनुसार, सीप र भाषा दक्षता प्राप्त गरेका नेपाली कामदारहरूले यस भिसाबाट मासिक ४ देखि ५ लाख रुपैयाँसम्म कमाउन सक्ने सम्भावना रहेको छ।

श्रम मन्त्रालयका अधिकारीहरूका अनुसार, यो व्यवस्थाले नेपालबाट दक्ष श्रमिक निर्यातलाई प्रोत्साहन गर्ने मात्र होइन,कोरियामा बढ्दो श्रम माग र आपूर्तिको सन्तुलन कायम गर्ने उद्देश्य पनि राखेको छ। साथै, यसले‘सीपयुक्त श्रम निर्यात’ को माध्यमबाट नेपालका युवा कामदारलाई उच्च आय र व्यावसायिक अनुभव दिलाउने अपेक्षा गरिएको छ।

यसअघि कोरिया जाने प्रक्रिया मुख्य तया ईपीएस (ई–९) प्रणालीमार्फत हुँदै आएको थियो। तर, ई–७ भिसा प्रणाली सुरु भएपछि सीप र भाषा दक्षता भएका श्रमिकलाई फरक र उच्चस्तरीय रोजगारी अवसर उपलब्ध हुने विश्वास व्यक्त गरिएको छ।