स्वास्थ्य बीमा संकट समाधानका लागि प्रधानमन्त्रीको पहल, आज सरोकारवालासँग बैठक

काठमाडौँ । प्रधानमन्त्री सुशीला कार्कीले देशभर देखिएको स्वास्थ्य बीमासम्बन्धी समस्या समाधान गर्न पहल थालेकी छिन्। यस विषयमा सरोकारवालासँग छलफल गर्न उनले आज अपराह्न प्रधानमन्त्री तथा मन्त्रिपरिषद्को कार्यालय, सिंहदरबारमा बैठक बोलाएकी छिन्। प्रधानमन्त्रीको सचिवालयका अनुसार बैठक दिउँसो साढे १ बजे बस्नेछ।

केही समययता स्वास्थ्य बीमाबापत पाउनुपर्ने रकम नपाएपछि देशका विभिन्न अस्पतालहरूले बीमा सेवा बन्द गर्ने चेतावनी दिएका छन्। अस्पतालहरूले लामो समयदेखि स्वास्थ्य बीमा बोर्डबाट रकम नआएकाले उपचार सेवा दिन गाह्रो भएको बताएका छन्। पैसा नहुँदा सबै बिरामीले स्वास्थ्य बीमाको सुविधा प्रयोग गर्न सकेका छैनन्। नेपालका केही ठूला अस्पतालहरूले त सूचना नै निकालेर अब बीमा सेवा दिन नसक्ने जनाइसकेका छन्।

स्वास्थ्य बीमा बोर्डका अनुसार देशभर सूचीकृत अस्पताल र स्वास्थ्य संस्थालाई १० अर्ब रुपैयाँभन्दा बढी रकम अझै भुक्तानी हुन बाँकी छ। यही समस्याका कारण स्वास्थ्य बीमा सेवा प्रभावित हुँदै आएको छ।