स्वास्थ्य बीमा कार्यक्रमबाट निजी र सामुदायिक संस्था हटाइँदै, साउन १ देखि सरकारी संस्थामार्फत मात्र प्रथम सेवा विन्दु सञ्चालन

काठमाडौं । स्वास्थ्य बीमा बोर्डले आगामी साउन १ गतेदेखि निजी तथा सामुदायिक स्वास्थ्य संस्थाहरूलाई ‘प्रथम सेवा विन्दु’ बाट हटाउने निर्णय गरेको छ। अबदेखि सरकारी स्वास्थ्य संस्था मात्र प्रथम सेवा विन्दुका रूपमा रहने व्यवस्था लागू हुने भएको हो।

बोर्डले २०८२ असार १० गते जारी गरेको सूचनामा उल्लेख गरिएको छ कि स्वास्थ्य बीमा ऐन, २०७४ (दोस्रो संशोधन) को दफा ९ को उपदफा (६) तथा नियमावली, २०७५ (प्रथम संशोधन) को नियम २ को खण्ड (छ) बमोजिम अब ‘प्रथम सेवा विन्दु’ को जिम्मेवारी सरकारी स्वास्थ्य संस्थाले मात्र पाउनेछ।

यस निर्णयअनुसार, हालसम्म सामुदायिक वा निजी क्षेत्रका अस्पताल तथा स्वास्थ्य केन्द्रहरूबाट प्रदान हुँदै आएको प्रारम्भिक सेवा अब स्वास्थ्य बीमा कार्यक्रमअन्तर्गत रहने छैन।

बोर्डले एक कार्यकारी निर्देशकस्तरको निर्णयका आधारमा यो व्यवस्था लागू गरिने उल्लेख गर्दै, हालसम्म सेवामा संलग्न निजी तथा सामुदायिक संस्थाहरूलाई धन्यवाद ज्ञापन गरेको छ।

साथै सूचना प्रविधि शाखा, प्रदेश शाखा कार्यालयहरू, र जिल्ला सम्पर्क कार्यालयहरूलाई समेत यस निर्णयको जानकारी गराइएको छ।

स्वास्थ्य बीमा बोर्डले आफ्नो नारा “तपाईँको स्वास्थ्य, हाम्रो अठोट” दोहोर्‍याउँदै, सेवा प्रदायक परिवर्तन भए पनि नागरिकको स्वास्थ्य सेवा पहुँच सुनिश्चित गरिने स्पष्ट पारेको छ।