जलवायु रूपान्तरण योजनामा वित्तीय संस्थाको भूमिका : एनएमबि बैंकका प्रमुख कार्यकारी अधिकृत घिमिरेको सहभागिता

काठमाडौं ।तेस्रो नेपाल इम्प्याक्ट इन्भेस्टमेन्ट फोरमको अवसरमा आयोजित “वित्तीय संस्थाहरूका लागि जलवायु रूपान्तरण योजना” शीर्षकको प्यानल छलफलमा एनएमबि बैंक लिमिटेडका प्रमुख कार्यकारी अधिकृत (सीईओ) गोविन्द घिमिरेले सहभागिता जनाएका छन्।

उक्त छलफल सत्रले नेपालको वित्तीय संस्थाहरू जलवायु–अनुकूल वित्तीय प्रणाली र दीगो वित्ततर्फ कत्तिको अघि बढिरहेका छन् भन्ने विषयमा केन्द्रीत रह्यो। छलफलमा सहभागिता जनाउँदै सीईओ घिमिरेले एनएमबि बैंकको प्रतिबद्धता जलवायु रूपान्तरण र दीगो वित्तमा अझ सशक्त रूपमा अघि बढाउने दिशामा रहेको बताएका थिए।

नेपालको जलवायु रूपान्तरण यात्रामा सकारात्मक प्रभाव पुर्‍याउने उद्देश्यसहित एनएमबि बैंकले जलवायु–मैत्री लगानी र नीतिगत रूपान्तरणमा अग्रसरता लिइरहेको छ। बैंकले दीगो वित्तलाई आफ्नो रणनीतिक प्राथमिकतामध्ये एकका रूपमा लिएको जनाएको छ।

कार्यक्रममा इन्भेस्ट फर इम्प्याक्ट नेपाल, एफएमओ (डच एन्टरप्रेन्योरियल डेभलपमेन्ट बैंक) र स्विस एजेन्सी फर डेभलपमेन्ट एन्ड कोअपरेसन लगायतका साझेदारहरूको पनि सक्रिय सहभागिता रहेको थियो।