शुक्लाफाँटा निकुञ्जमा हराएका महिलाहरू सुरक्षित रूपमा आए परिवारको सम्पर्कमा

काठमाडौँ । कञ्चनपुरको शुक्लाफाँटा राष्ट्रिय निकुञ्जमा च्याउ टिप्न गएका र केही समयदेखि सम्पर्कविहीन भएका महिलाहरू सुरक्षित रूपमा परिवारको सम्पर्कमा आएका छन्। भीमदत्त नगरपालिका–१९ बागफाँटाका ती महिलाहरू आइतबार बिहान अनुमति नलिई दुई समूहमा विभाजन भएर निकुञ्जभित्र च्याउ खोज्न गएका थिए। साँझसम्म पनि घर नफर्किएपछि परिवारले चिन्ता व्यक्त गर्दै प्रहरीलाई खबर गरेका थिए।

त्यसपछि नेपाली सेनाको रणसिंह दल गण र अन्य सुरक्षा निकायले खोजी अभियान थालेका थिए। खोजी अभियानकै क्रममा महिलाहरू सुरक्षित रहेको पुष्टि भएको हो। रणसिंह दल गणका गणपति प्रमुख सेनानी प्रकाश घिमिरेले सबै महिलाहरू परिवारको सम्पर्कमा आइसकेको जानकारी दिनुभयो।

निकुञ्ज कार्यालयले खराब मौसमका कारण असार १५ गतेदेखि निकुञ्जभित्र प्रवेश गर्न रोक लगाएको थियो। तर त्यसको जानकारी हुँदाहुँदै पनि उनीहरू अनुमति नलिई जङ्गलमा च्याउ टिप्न गएका थिए। अहिले उनीहरू सकुशल घर फर्किएको पुष्टि भएपछि परिवार र स्थानीयवासीले राहतको महसुस गरेका छन्।