काठमाडौँ । गत बुधबार भोटेकोशी नदी तथा आसपासका क्षेत्रमा आएको विनाशकारी बाढीबाट भएको क्षतिको सरकारी अभिलेखले विपद्को भयावह अवस्था देखाएको छ। सरकारी उद्धार अनुरोध पोर्टलमा रहेको पछिल्लो विवरणअनुसार बाढीपछि १५ हजार ३२९ जना अझै बेपत्ता छन्।
पोर्टलमा हालसम्म २ हजार ५०७ जना फेला परेको विवरण उल्लेख छ भने १ हजार ८०८ जनासम्बन्धी खोजी तथा समस्या समाधान भएको जनाइएको छ। प्रभावित क्षेत्रमा बेपत्ताको खोजी तथा उद्धार कार्य जारी रहे पनि ठूलो संख्यामा मानिसको अवस्था अझै अज्ञात रहेको सरकारी अभिलेखले देखाएको छ।
बेपत्ता हुनेमा बालबालिका तथा ज्येष्ठ नागरिकको संख्या पनि उल्लेख्य छ। अभिलेखअनुसार १८ वर्षमुनिका ६७६ बालबालिका र ६० वर्षभन्दा माथिका ४०९ ज्येष्ठ नागरिक अझै सम्पर्कविहीन छन्।
पछिल्लो २४ घण्टामा मात्रै ६ हजार ३३० जनासम्बन्धी बेपत्ता विवरण पोर्टलमा थप रिपोर्ट भएको देखिन्छ। यसले बाढी प्रभावित क्षेत्रमा ठूलो संख्यामा नागरिकको अवस्था अझै यकिन हुन नसकेको संकेत गरेको छ।
यसैबीच, बाढीले बगाएर ल्याएका शव संकलन तथा पहिचानको काम पनि जारी रहेको छ। चितवनका विभिन्न नदी तथा बगर क्षेत्रमा आज थप शवको खोजी तथा संकलन गर्ने तयारी गरिएको जनाइएको छ।
भोटेकोशी नदीमा आएको बाढीले रसुवासहित आसपासका जिल्लामा ठूलो जनधनको क्षति पुर्याएको छ। बाढीका कारण विभिन्न बस्ती, सडक, पुल तथा जलविद्युत् आयोजनामा क्षति पुगेको छ भने प्रभावित क्षेत्रमा बेपत्ताको खोजी, उद्धार तथा राहत कार्यलाई निरन्तरता दिइएको छ।
सरकारी निकाय, सुरक्षा निकाय तथा उद्धार टोलीहरू प्रभावित क्षेत्रमा परिचालित रहे पनि भौगोलिक कठिनाइ र भौतिक संरचनामा भएको क्षतिका कारण खोज तथा उद्धार कार्य चुनौतीपूर्ण बनेको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
