प्रतिनिधिसभाको बैठक बस्दै

काठमाडौं । सङ्घीय संसद्को प्रतिनिधिसभाको बैठक आज दिउँसो १ बजे सिंहदरबारमा बस्दैछ। बैठकमा समुद्रमा पाइने जीवजन्तु र वनस्पतिको संरक्षण तथा दिगो प्रयोगसम्बन्धी अन्तर्राष्ट्रिय सम्झौतामाथि छलफल हुने सम्भावित कार्यसूची छ।

कानुन, न्याय तथा संसदीय मामिलामन्त्री सोविता गौतमले संयुक्त राष्ट्रसङ्घको सामुद्रिक कानुनअन्तर्गत राष्ट्रिय सीमाभन्दा बाहिर रहेका समुद्री जैविक विविधताको संरक्षण र दिगो प्रयोगसम्बन्धी सम्झौतामाथि सामान्य छलफल गरियोस् भन्ने प्रस्ताव प्रस्तुत गर्नेछिन्।

यसैगरी, आज तीन वटा संसदीय समितिको बैठक पनि बस्ने भएको छ। अन्तर्राष्ट्रिय सम्बन्ध तथा पर्यटन समिति, राज्य व्यवस्था तथा सुशासन समिति र विकास, आर्थिक मामिला तथा सुशासन समितिको बैठक बस्ने संसद् सचिवालयले जनाएको छ।