काठमाडौं । परराष्ट्रमन्त्री शिशिर खनालले प्रधानमन्त्री बालेन्द्र शाहको नेतृत्वमा नेपाली प्रतिनिधिमण्डल संयुक्त राष्ट्रसंघको महासभामा सहभागी हुन अर्को साता संयुक्त राज्य अमेरिका प्रस्थान गर्ने बताएका छन्।
बिहीबार सिंहदरबारमा बसेको अन्तर्राष्ट्रिय सम्बन्ध तथा पर्यटन समितिको बैठकमा बोल्दै मन्त्री खनालले संयुक्त राष्ट्रसंघको ८१औँ महासभामा प्रधानमन्त्रीको नेतृत्वमा नेपाली प्रतिनिधिमण्डल सहभागी हुने जानकारी दिएका हुन्। महासभाको उच्चस्तरीय छलफल सेप्टेम्बर २२ देखि २८ सम्म न्यूयोर्कमा हुँदैछ भने प्रधानमन्त्री शाहले सेप्टेम्बर २४ मा महासभालाई सम्बोधन गर्ने कार्यक्रम रहेको छ।
महासभामा नेपालको सहभागिताका क्रममा जलवायु परिवर्तनका कारण नेपालले भोगिरहेको जोखिम, जलवायु न्याय, अन्तर्राष्ट्रिय सहयोग तथा पुनर्निर्माणलगायतका विषयलाई प्राथमिकताका साथ उठाउने तयारी छ। हालैका विपद्बाट भएको मानवीय तथा भौतिक क्षतिका विषयमा अन्तर्राष्ट्रिय समुदायको ध्यानाकर्षण गराउँदै नेपालले जलवायुजन्य विपद्बाट प्रभावित मुलुकका लागि सहयोग र जलवायु वित्तको विषयसमेत अघि बढाउने जनाएको छ।
परराष्ट्रमन्त्री खनालले महासभाको अवसरमा विभिन्न उच्चस्तरीय तथा मन्त्रीस्तरीय बैठकमा सहभागिता जनाउने कार्यक्रम छ। उनले कम विकसित मुलुक, भूपरिवेष्टित विकासोन्मुख मुलुक, असंलग्न राष्ट्र तथा समूह–७७ र चीनलगायतका बैठकमा सहभागी हुनेछन्। साथै, विभिन्न मुलुकका समकक्षी तथा संयुक्त राष्ट्रसंघका उच्च अधिकारीसँग भेटवार्ता गर्ने कार्यक्रमसमेत रहेको छ।
बिहीबारको समितिको बैठकमा जलवायु परिवर्तनसम्बन्धी विषयमा विज्ञहरूसँग पनि छलफल भएको थियो। बैठकमा नेपालले जलवायु परिवर्तनबाट भोगिरहेको जोखिम, जलवायु न्याय, अन्तर्राष्ट्रिय सहयोग र जलवायु वित्तका विषयमा विज्ञहरूले धारणा राखेका थिए।
महासभाको मञ्चमार्फत नेपालको राष्ट्रिय हित तथा अन्तर्राष्ट्रिय सम्बन्धसँग जोडिएका प्राथमिकता प्रस्तुत गर्ने विषयमा पनि बैठकमा छलफल भएको थियो। नेपालको अन्तर्राष्ट्रिय मञ्चमा जलवायु परिवर्तन र त्यसबाट हिमाली क्षेत्रमा परेको प्रभावलाई प्रभावकारी रूपमा उठाउने विषयलाई समेत प्राथमिकतामा राखिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
