क्यानाडालाई ‘एसोसिएट सदस्य’ बनाउन ईयूको प्रस्ताव

काठमाडौं । युरोपेली सङ्घ (ईयू) ले क्यानाडासँग व्यापार, सुरक्षा र प्रविधिसहित विभिन्न क्षेत्रमा सहकार्य बढाउने प्रस्ताव गरेको छ। ईयूले क्यानाडालाई सङ्घको पहिलो ‘एसोसिएट सदस्य’ बनाउने प्रस्ताव अघि सारेको हो।

युरोपेली आयोगकी अध्यक्ष उर्सुला भोन डेर लेयनले बुधबार युरोपेली संसद्मा वार्षिक सम्बोधन गर्दै क्यानाडासँग अझ नजिकको सम्बन्ध बनाउनुपर्ने बताइन्। उनले क्यानाडाका प्रधानमन्त्री मार्क कार्नीसँग लोकतन्त्र र समान मूल्यमा आधारित ‘भविष्यका लागि गठबन्धन’ बनाउन प्रस्ताव गरिन्।

प्रस्तावित सहकार्य अहिलेको व्यापार सम्झौता (सिइटिए) भन्दा व्यापक हुनेछ। यसअन्तर्गत रक्षा सामग्री उत्पादन, ऊर्जा, आर्कटिक क्षेत्र, महत्त्वपूर्ण खनिज, कृत्रिम बौद्धिकता, क्वान्टम प्रविधि, साइबर सुरक्षा र आर्थिक सुरक्षामा सहकार्य बढाउने योजना छ।

तर अमेरिकी राष्ट्रपति डोनाल्ड ट्रम्पले ईयूको प्रस्तावप्रति असन्तुष्टि जनाएका छन्। उनले क्यानाडालाई एसोसिएट सदस्य बनाउने प्रयासलाई ‘शत्रुतापूर्ण कदम’ मान्न सकिने भन्दै युरोपेली सामानमा थप शुल्क लगाउने चेतावनी दिएका छन्।

क्यानाडाले भने अमेरिकामाथिको निर्भरता घटाउँदै ईयूसँग सम्बन्ध बलियो बनाउन खोजिरहेको छ। क्यानाडा र ईयूबीच एसोसिएट सदस्यताको अधिकार र जिम्मेवारीबारे अन्तिम निर्णय भने भइसकेको छैन। अक्टोबरमा हुने शिखर सम्मेलनबाट यसबारे थप स्पष्टता आउने अपेक्षा गरिएको छ।