
काठमाडौं । शिक्षा तथा खेलकुदमन्त्री सस्मित पोखरेलले अखिल नेपाल फुटबल संघ (एन्फा) माथि लागेको निलम्बन फुकुवाका लागि विश्व फुटबल महासंघ (फिफा) र एसियाली फुटबल महासंघ (एएफसी) का शीर्ष अधिकारीहरूसँग छलफल गरेका छन्।
थाइल्यान्डको बैंककमा आयोजित एएफसी अवार्ड समारोहका क्रममा मन्त्री पोखरेलले फिफा अध्यक्ष जियानी इन्फान्टिनो, महासचिव माटियास ग्राफस्ट्रोम र एएफसी अध्यक्ष शेख सलमान बिन इब्राहिम अल खलिफासँग भेटवार्ता गरेका हुन्। भेटका क्रममा उनले फिफा र एएफसीका प्रतिनिधिलाई नेपाली महसमेत उपहार दिएका थिए।
मन्त्री पोखरेलको सचिवालयका अनुसार भेटवार्तामा एन्फामाथिको निलम्बन फुकुवा गर्ने विषयमा सकारात्मक छलफल भएको थियो। विशेषगरी एन्फाको कानुनी प्रक्रिया, तहगत निर्वाचन र निलम्बन फुकुवाका लागि पूरा गर्नुपर्ने प्रक्रियाबारे कुराकानी भएको जनाइएको छ।
छलफलका क्रममा एन्फाले आवश्यक तहगत निर्वाचन प्रक्रिया अघि बढाउने सहमति जनाएको थियो। त्यसपछि राष्ट्रिय खेलकुद परिषद् (राखेप) ले पनि एन्फामाथि लगाएको प्रतिबन्ध फुकुवा गरेको छ।
राखेपले प्रतिबन्ध हटाएसँगै फिफाले पनि एन्फामाथिको निलम्बन फुकुवा गर्ने विषयमा मौखिक सहमति जनाएको मन्त्री पोखरेलको सचिवालयले जनाएको छ। यससँगै एन्फामाथिको अन्तर्राष्ट्रिय निलम्बन हटाउन आवश्यक प्रशासनिक प्रक्रिया अघि बढ्ने अपेक्षा गरिएको छ।
अब सम्बन्धित निकायले आवश्यक प्रक्रिया पूरा गरेपछि फिफाबाट समेत औपचारिक रूपमा निलम्बन फुकुवा हुने बाटो खुल्ने बताइएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे