बडीमालिका मन्दिरमा भदौ १ देखि मेला, मुख्य पूजाअघि नै दर्शनको व्यवस्था

बाजुरा । सुदूरपश्चिम प्रदेशको प्रमुख धार्मिक तथा पर्यटकीय गन्तव्य बडीमालिका मन्दिरमा यस वर्षको मेला तथा पूजाआजा भदौ १ गतेदेखि सुरु हुने भएको छ। दर्शनार्थीको बढ्दो चापलाई व्यवस्थापन गर्दै मुख्य पूजाको दिनअघि नै मेला सुरु गर्ने निर्णय गरिएको हो।

जिल्लामा आयोजित सर्वपक्षीय बैठकले मुख्य पूजाको दिन एकैपटक ठूलो संख्यामा भक्तजन जम्मा हुँदा व्यवस्थापनमा कठिनाइ हुने भएकाले भदौ १ गतेदेखि नै पूजाआजा तथा मेला सञ्चालन गर्ने निर्णय गरेको जिल्ला समन्वय समिति प्रमुख तुलसीराम रोकायाले जानकारी दिए।

मन्दिरका पुजारी नेत्र पाध्यायका अनुसार बडीमालिकामा हरेक वर्ष जनैपूर्णिमाको अघिल्लो दिन अर्थात् साउन शुक्ल चतुर्दशीमा मुख्य पूजा गर्ने परम्परा छ। यस वर्ष भदौ १२ गते जनैपूर्णिमा परेकाले त्यसको अघिल्लो दिन बडीमालिकामा मुख्य पूजा गरिनेछ।

गत वर्ष बडीमालिका मन्दिरमा करिब ४५ हजारभन्दा बढी भक्तजनले दर्शन गरेको बताइएको छ। बाजुरालगायत देशका विभिन्न जिल्लाबाट भक्तजन आउने गरेका छन् भने छिमेकी मुलुक भारतबाट समेत दर्शनार्थी आउने गरेका छन्। बाजुरा, डोटी र जुम्लाबाट पूजा सामग्रीसहित सरकारी टोली बडीमालिका पुग्ने धार्मिक परम्परासमेत रहेको छ।

यस वर्ष दर्शनार्थीको संख्या अझ बढ्ने अनुमान गरिएको छ। गत वर्ष नेपाली सेनाले प्यागोडा शैलीमा बडीमालिका माताको नयाँ मन्दिर निर्माण गरेपछि धार्मिक तथा पर्यटकीय आकर्षण थप बढेको स्थानीयको भनाइ छ। नयाँ मन्दिरका कारण पनि यस वर्ष भक्तजनको संख्या बढ्ने अनुमान गरिएको स्थानीय चन्द्र थापाले बताए।

बडीमालिका नगरपालिका प्रमुख अमरबहादुर खड्काका अनुसार मेला तथा पूजाआजालाई सुरक्षित, व्यवस्थित र मर्यादित बनाउन आवश्यक तयारी सुरु गरिएको छ। जिल्ला प्रशासन कार्यालय, स्थानीय तह तथा सुरक्षा निकायले व्यवस्थापनको तयारी तीव्र बनाएका छन्।

मेला व्यवस्थापनका लागि १४ बुँदे निर्णयसमेत गरिएको नगरप्रमुख खड्काले जानकारी दिए। मन्दिर जाने मार्गमा संकेत चिह्न, साइनबोर्ड तथा सूचनापाटी राख्ने र धार्मिक क्षेत्रको पवित्रता कायम गर्न मदिरा, लागूपदार्थ तथा मासुजन्य वस्तुको प्रयोग तथा बिक्रीमा रोक लगाउने निर्णय गरिएको उनले बताए।

त्यस्तै, बडीमालिका पुग्ने क्रममा लेक लाग्ने, बिरामी पर्ने वा अन्य कुनै कारणले आपत्कालीन उद्धार आवश्यक पर्ने दर्शनार्थीका लागि तत्काल उद्धारको व्यवस्था मिलाइएको छ। निमित्त जिल्ला समन्वय अधिकारी दिपेन्द्र पाण्डेका अनुसार जिल्ला प्रशासन, सुरक्षा निकाय तथा स्थानीय तहबीच समन्वय गरी आवश्यक उद्धार संयन्त्र परिचालन गरिनेछ।

समुद्री सतहबाट करिब ४ हजार २०० मिटर उचाइमा रहेको बडीमालिका क्षेत्र धार्मिक आस्था र प्राकृतिक सौन्दर्यका कारण महत्वपूर्ण गन्तव्यका रूपमा परिचित छ। दर्शनार्थीको स्वास्थ्य सुरक्षालाई ध्यानमा राख्दै स्थानीय तहले जिल्ला अस्पताल तथा स्वास्थ्य कार्यालयसँग समन्वय गर्ने र स्वास्थ्यकर्मी परिचालन तथा अन्य व्यवस्थापनमा नेपाली सेनाले समन्वय गर्ने तयारी गरिएको छ।

यस वर्ष मेला सुरु हुनुअघि नै सञ्चार सम्पर्क सहज बनाउन बडीमालिका क्षेत्रमा दूरसञ्चारको टावर सञ्चालनमा ल्याउने तयारीसमेत भइरहेको छ। यद्यपि, मौसम प्रतिकूल हुँदा आवश्यक सामग्री ढुवानीमा केही समस्या भइरहेको जनाइएको छ।