काठमाडौं । पाकिस्तानको कराकोरम हिमशृङ्खलामा अवस्थित ब्रोड पिक क्षेत्रमा हिमपहिरोमा परी निधन भएका नेपाली पर्वतारोही निर्मल पुर्जालगायत आरोहीहरूको शव उद्धारका लागि ग्राउन्ड टिम क्याम्प–१ तर्फ झर्ने तयारीमा जुटेको छ।
उद्धार अभियानमा संलग्न ग्राउन्ड टिमका अनुसार पहिलो चरणमा हिमपहिरोमा परी निधन भएका आरोहीहरूको शव क्याम्प–१ सम्म ल्याइनेछ। त्यसपछि सोमबार जापानी क्याम्पसम्म शव तथा उद्धार गरिएका आरोहीलाई सुरक्षित रूपमा ल्याउने तयारी गरिएको छ।
मौसम तथा हिमालको अवस्था अनुकूल भए जापानी क्याम्पबाट हेलिकप्टरमार्फत शव र उद्धार टोलीलाई थप सुरक्षित स्थानमा सार्ने तयारी गरिएको टिमले जनाएको छ। दिवंगत आरोहीहरूको शव सुरक्षित रूपमा उद्धार गरी सम्मानपूर्वक स्वदेश फर्काउने लक्ष्यसहित अभियान अघि बढाइएको जनाइएको छ।
पाकिस्तानको कराकोरम हिमशृङ्खलामा पर्ने ८ हजार ४७ मिटर अग्लो ब्रोड पिकमा गत बिहीबार अर्थात् १४ साउनको मध्याह्नतिर हिमपहिरो गएको थियो। हिमपहिरोमा परी ६ नेपालीसहित १० जना आरोही बेपत्ता भएका थिए। बेपत्ता भएकामध्ये पुर्जाको निधन भएको पुष्टि शनिबार भएको थियो। पुर्जा उक्त आरोहण टोलीका नेता थिए।
उद्धार अभियान मौसम र हिमालको अवस्थामाथि निर्भर रहेकाले सुरक्षित रूपमा शव तथा उद्धार टोलीलाई तल ल्याउने गरी चरणबद्ध रूपमा काम अघि बढाइएको ग्राउन्ड टिमले जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
