आरसीओडीको म्यादबारे निर्णय गर्न ऊर्जामन्त्रीले सरोकारवालासँग छलफल गर्दै

काठमाडौँ । ऊर्जा, जलस्रोत तथा सिँचाइमन्त्री विराजभक्त श्रेष्ठले आज जलविद्युत् आयोजनाको प्रगति र व्यावसायिक विद्युत् उत्पादन सुरु गर्ने अन्तिम मिति (आरसीओडी) बारे छलफल गर्न सरोकारवालाको बैठक बोलाएका छन्। बैठक दिउँसो ३ बजे नेपाल विद्युत् प्राधिकरणमा हुनेछ। यसमा प्राधिकरणका पदाधिकारी र उत्पादनको अन्तिम चरणमा रहेका करिब ७० मध्ये प्राथमिकतामा परेका जलविद्युत् आयोजनाका प्रतिनिधि सहभागी हुनेछन्। बैठकमा बाढी, पहिरो र अन्य प्राकृतिक विपत्तिका कारण समयमै उत्पादन सुरु गर्न नसकेका आयोजनाको अवस्था समीक्षा गर्दै आरसीओडीको म्याद थप्ने विषयमा छलफल गरिनेछ।

साथै, अनुमति लिएर पनि लामो समयदेखि काम अघि नबढाएका आयोजनाबारे आवश्यक निर्णय गर्ने तयारी छ। ऊर्जा मन्त्रालयका अनुसार सरकारले निर्माणाधीन आयोजनाको अवस्था हेरेर आवश्यक सहजीकरण गर्ने नीति लिएको छ। यसअघि नेपाल विद्युत् प्राधिकरणले आयोजनाको प्रगति र पीपीए कार्यान्वयनका आधारमा आयोजनालाई चार समूहमा वर्गीकरण गर्ने निर्णय गरिसकेको छ।