उपत्यकामा राति ८ देखि ११ बजेसम्म रात्रिकालीन बस सेवा सञ्चालन

काठमाडौं। काठमाडौं महानगरपालिकाको संयोजनमा राजधानी उपत्यकामा रात्रिकालीन बस सेवा सुरु गरिएको छ। महानगरको पहलपछि उपत्यकाका विभिन्न पालिका र साझा यातायातको सहकार्यमा यो सेवा सञ्चालनमा ल्याइएको हो।

नयाँ व्यवस्थाअनुसार अब राति ८ बजेदेखि ११ बजेसम्म पनि सार्वजनिक बस सेवा उपलब्ध हुनेछ। यात्रुहरूको सहज आवागमनलाई ध्यानमा राख्दै दुई फरक मार्गमा सेवा सञ्चालन गरिएको छ।

पहिलो मार्ग ललितपुरको लगनखेलबाट सुरु भई पाटन अस्पताल, अल्का, नर्भिक अस्पताल, प्रसूति गृह, ट्रमा सेन्टर, वीर अस्पताल, कान्ति बाल अस्पताल, शिक्षण अस्पताल र गंगालाल हृदय केन्द्र हुँदै बुढानीलकण्ठसम्म विस्तार गरिएको छ। उत्तर–दक्षिण दिशाको यो मार्ग करिब १६ किलोमिटर लामो रहेको छ।

त्यस्तै दोस्रो मार्ग थानकोटबाट सुरु भई सतुंगल, कलंकी, कालीमाटी, त्रिपुरेश्वर, थापाथली, माइतीघर मण्डला, बानेश्वर, मीनभवन, तीनकुने हुँदै अन्तर्राष्ट्रिय विमानस्थलसम्म सञ्चालन हुनेछ। पूर्व–पश्चिम दिशाको यो मार्ग करिब २० किलोमिटर लामो रहेको छ।

यी दुवै मार्गमा चार वटा विद्युतीय बस सञ्चालन गरिने छन्। तोकिएका बस बिसौनीहरूमा करिब प्रत्येक २० मिनेटमा बस उपलब्ध हुने व्यवस्था मिलाइएको छ। सेवा सुरु गर्ने कार्यक्रममा काठमाडौं महानगरकी कार्यवाहक मेयर सुनीता डंगोल सहभागी भएकी थिइन्।