विश्लेषक भरत दाहाललाई तत्काल रिहा गर्न नेकपाको माग

काठमाडौं । नेकपा मालेले विश्लेषक भरत दाहाललाई तत्काल रिहा गर्न माग गरेको छ। पार्टी महासचिव सीपी मैनालीले आइतबार जारी गरेको विज्ञप्तिमा राजनीतिक विचार तथा अभिव्यक्तिमाथिको दमन बन्द गर्न सरकारसँग आग्रह गरिएको छ। विज्ञप्तिमा राज्य, सरकार र शासन व्यवस्थाका कमजोरीबारे प्रश्न उठाउनु तथा आलोचना गर्नु नागरिकको लोकतान्त्रिक अधिकार भएको उल्लेख छ।

विचारसँग असहमत भएकै आधारमा पक्राउ गर्ने र राज्यशक्तिको दुरुपयोग गरी असहमति दबाउने प्रवृत्ति लोकतान्त्रिक संस्कारविपरीत रहेको मालेको भनाइ छ। साइबर ब्युरोमा परेको उजुरीका आधारमा दाहाल पक्राउ परेको भनिए पनि आरोप र अनुसन्धानको आधार स्पष्ट नभएको भन्दै मालेले आपत्ति जनाएको छ। कुनै कसुरको प्रमाण भए सार्वजनिक गरी निष्पक्ष कानुनी प्रक्रियाबाट छानबिन गर्न पनि माग गरिएको छ।

विराटनगर( राजनीतिक विश्लेषक तथा त्रिमूल नेपालका अध्यक्ष भरत दाहाल मोरङको सुन्दरहरैँचाबाट पक्राउ परेका थिए। मोरङ प्रहरीका अनुसार दाहाललाई आइतबार बिहान सुन्दरहरैँचा नगरपालिका–८ सलकपुरस्थित गौरी ढकालको चिया पसलबाट पक्राउ गरिएको हो।