प्रधानमन्त्री दैवी प्रकोप उद्धार कोषमा करिब १५ अर्ब जम्मा

काठमाडौं । रसुवाको भोटेकोशी नदीमा आएको बाढीबाट प्रभावित नागरिकका लागि सहयोग जुट्ने क्रम बढेसँगै सरकारले सञ्चालन गरेको प्रधानमन्त्री दैवी प्रकोप उद्धार कोष तथा प्रधानमन्त्री राहत कोषमा करिब १५ अर्ब रुपैयाँ जम्मा भएको छ।

प्रधानमन्त्री तथा मन्त्रिपरिषद्को कार्यालयका अनुसार हाल दुवै कोषमा गरी १४ अर्ब ८८ करोड ९० लाख ३८ हजार ८७१ रुपैयाँ मौज्दात रहेको छ। बाढी तथा विपद्बाट प्रभावित क्षेत्रमा राहत तथा उद्धारका लागि कोषमा जम्मा भएको रकममध्ये सरकारले यसअघि नै एक अर्ब रुपैयाँ निकासा गरिसकेको छ।

कार्यालयका अनुसार कोषको रकम विभिन्न नौवटा वाणिज्य बैंकमा रहेको खातामा जम्मा गरिएको छ। ती बैंकका खातामा ११ अर्ब १४ करोड २० लाख ५० हजार ९४७ रुपैयाँ मौज्दात रहेको छ।

त्यसैगरी, हिमालयन बैंक र लक्ष्मी सनराइज बैंकमा रहेको अमेरिकी डलर खातामा दुई करोड ४४ लाख ७४ हजार १२१ अमेरिकी डलर जम्मा भएको कार्यालयले जनाएको छ।

भोटेकोशी नदीमा आएको बाढीबाट रसुवालगायत प्रभावित क्षेत्रमा राहत, उद्धार तथा पुनःस्थापनाका लागि विभिन्न व्यक्ति, संस्था, निजी क्षेत्र तथा अन्य दाताबाट आर्थिक सहयोग प्राप्त भइरहेको छ। सरकारले प्राप्त सहयोगलाई विपद् प्रभावितको राहत तथा पुनःस्थापनामा परिचालन गर्ने जनाएको छ।