नेपाल–यूएई सम्बन्ध सुदृढ बनाउन चन्द्रागिरिमा स्वागत तथा रात्रिभोज कार्यक्रम

काठमाडौं । नेपाल र संयुक्त अरब इमिरेट्स (यूएई) बीच व्यापार, लगानी तथा आर्थिक सहकार्यलाई नयाँ उचाइमा पुर्‍याउन संयुक्त परियोजना (ज्वाइन्ट भेन्चर) मार्फत सहकार्य विस्तार गर्नुपर्नेमा जोड दिइएको छ। नेपाल–यूएई उच्चस्तरीय प्रतिनिधिमण्डलको सम्मानमा चन्द्रागिरिमा आयोजित स्वागत तथा रात्रिभोज कार्यक्रममा वक्ताहरूले दुवै देशबीचको आर्थिक साझेदारी अझ सुदृढ बनाउन अनुकूल वातावरण तयार भएको बताएका हुन्।

कार्यक्रममा यूएईका वैदेशिक व्यापार मन्त्री डा. थानी अहमद अल जेयौदी, नेपालका परराष्ट्रमन्त्री शिशिर खनाल, नेपालका लागि यूएईका राजदूत अब्दुल्ला अल शम्सी, यूएई चेम्बर्स अफ कमर्सका महासचिव हुमैद बिन सलेम, नासेर अल जुनैबी तथा नेपाल र यूएईका सरकारी एवं निजी क्षेत्रका प्रतिनिधिहरू सहभागी थिए।

आयोजकले निजी क्षेत्रको लगानीमा विकसित चन्द्रागिरिलाई नेपालको प्रमुख पर्यटन गन्तव्यका रूपमा प्रस्तुत गर्दै यसमार्फत नेपालको प्राकृतिक सौन्दर्य, आतिथ्यता र पर्यटन पूर्वाधारको सम्भावना अन्तर्राष्ट्रिय प्रतिनिधिमाझ परिचित गराउन पाएकोमा खुसी व्यक्त गरे। साथै, निमन्त्रणा स्वीकार गरी चन्द्रागिरि भ्रमण गरेका सम्पूर्ण अतिथिप्रति आभार व्यक्त गरिएको थियो।

कार्यक्रममा नेपाल र यूएईबीच विगत पाँच दशकदेखि विश्वास, मित्रता र आपसी सहयोगमा आधारित सम्बन्ध कायम रहेको उल्लेख गर्दै सन् २०२७ मा दुई देशबीच कूटनीतिक सम्बन्ध स्थापना भएको ५० वर्ष पूरा हुने अवसरलाई व्यापार, लगानी र आर्थिक सहकार्य विस्तार गर्ने महत्वपूर्ण आधारका रूपमा उपयोग गर्न सकिने धारणा व्यक्त गरिएको थियो।

यूएईले दूरदर्शी नेतृत्व, लगानीमैत्री नीति, नवप्रवर्तन र खुला अर्थतन्त्रमार्फत हासिल गरेको आर्थिक रूपान्तरण विश्वका लागि उदाहरणीय रहेको उल्लेख गर्दै नेपालले पनि अन्तर्राष्ट्रिय लगानी, आधुनिक प्रविधि र निजी क्षेत्रसँगको सहकार्यबाट आफ्नो आर्थिक सम्भावनालाई तीव्र विकासमा रूपान्तरण गर्न सक्ने विश्वास व्यक्त गरिएको थियो।

कार्यक्रममा नेपालमा पर्यटन, जलविद्युत्, पूर्वाधार, डिजिटल भुक्तानी तथा फिनटेक, कृषि, उत्पादनमूलक उद्योग र लजिस्टिक्सलगायत क्षेत्रमा प्रशस्त लगानीका अवसर रहेको उल्लेख गरियो। यूएईसँग रहेको लगानी क्षमता, प्रविधि र व्यवस्थापकीय अनुभवलाई उपयोग गर्दै यी क्षेत्रमा संयुक्त लगानीमार्फत विश्वस्तरीय परियोजना विकास गर्न सकिने र त्यसबाट दुवै देशमा रोजगारी सिर्जना, आर्थिक वृद्धि तथा साझा समृद्धिमा योगदान पुग्ने धारणा व्यक्त गरियो।

त्यसैगरी, नेपाल र यूएईबीच द्विपक्षीय लगानी सम्झौता (Bilateral Investment Agreement–BIA), दोहोरो कर नपर्ने सम्झौता (Double Taxation Avoidance Agreement–DTAA) तथा व्यापक आर्थिक साझेदारी सम्झौता (Comprehensive Economic Partnership Agreement–CEPA) सम्बन्धी छलफल सकारात्मक रूपमा अघि बढिरहेको जानकारी दिइयो। यी सम्झौता छिट्टै निष्कर्षमा पुग्ने अपेक्षा व्यक्त गर्दै त्यसबाट लगानीकर्ताको विश्वास अभिवृद्धि हुनुका साथै नेपालमा थप लगानीमैत्री वातावरण निर्माण, निजी क्षेत्रबीच सहकार्य विस्तार तथा द्विपक्षीय आर्थिक सम्बन्ध अझ मजबुत हुने विश्वास व्यक्त गरिएको थियो।

कार्यक्रमको अन्त्यमा चन्द्रागिरि भ्रमणले नेपालको पर्यटन सम्भावनासँगै लगानी, साझेदारी र आर्थिक सहकार्यका नयाँ अवसरहरूलाई नजिकबाट अनुभूति गराएको उल्लेख गर्दै आगामी दिनमा नेपाल–यूएई सम्बन्ध व्यापार, लगानी, नवप्रवर्तन र दिगो विकासका क्षेत्रमा अझ सुदृढ हुँदै जाने अपेक्षा व्यक्त गरिएको थियो।