काठमाडौं । राष्ट्रिय गौरवको आयोजना पुष्पलाल (मध्यपहाडी) लोकमार्ग निर्माण सुरु भएको १७ वर्ष बितिसक्दा पनि पूर्ण हुन सकेको छैन। पटक–पटक समयसीमा र लागत संशोधन गरिँदा आयोजनाको अनुमानित लागत झन्डै तीन गुणासम्म बढेको छ भने सम्पन्न हुने लक्ष्य पनि एक दशकभन्दा बढी पछाडि धकेलिएको छ।
पाँचथरको चियो भन्ज्याङदेखि बैतडीको झुलाघाटसम्म फैलिएको १ हजार ८७९ किलोमिटर लामो यो लोकमार्ग आर्थिक वर्ष २०६४/६५ मा ३३ अर्ब ३६ करोड रुपैयाँको लागतमा सुरु गरिएको थियो। सुरुमा आर्थिक वर्ष २०७४/७५ भित्र सम्पन्न गर्ने लक्ष्य राखिए पनि निर्माण प्रगति अपेक्षाअनुसार हुन नसक्दा कार्यतालिका पटक–पटक संशोधन गरिएको छ। हाल आयोजनालाई आर्थिक वर्ष २०८४/८५ सम्म ८४ अर्ब ३३ करोड रुपैयाँको संशोधित लागतमा सम्पन्न गर्ने लक्ष्य निर्धारण गरिएको छ।
चालु आर्थिक वर्ष २०८१/८२ मा ५८ किलोमिटर सडक कालोपत्रे गर्ने तथा ६ वटा पुल निर्माण गर्ने लक्ष्यसहित काम अघि बढाइएको छ। हालसम्म १ हजार ५१० किलोमिटर सडक कालोपत्रे र १११ वटा पुल निर्माण सम्पन्न भएको छ।
उपलब्ध विवरणअनुसार आयोजना सुरु भएको १७ वर्षको अवधिमा लोकमार्गको समग्र भौतिक प्रगति ८१.७३ प्रतिशत पुगेको छ। वित्तीयतर्फ चालु आर्थिक वर्षमा ३ अर्ब १७ करोड ८१ लाख रुपैयाँ खर्च भएको छ भने आयोजना सुरु भएदेखि हालसम्म कुल ७२ अर्ब ३४ करोड रुपैयाँ खर्च भइसकेको छ।
आयोजनाको लागत र समय दुवै उल्लेखनीय रूपमा बढ्दै जाँदा बाँकी निर्माण कार्य निर्धारित समयभित्र सम्पन्न गर्न प्रभावकारी कार्यान्वयन, निर्माण व्यवस्थापन तथा नियमित अनुगमनलाई थप सुदृढ बनाउनुपर्ने आवश्यकता औँल्याइएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
