काठमाडौं । पाल्पाको सिद्धबाबा क्षेत्रमा निर्माणाधीन सुरुङ आयोजनामा हालसम्म ३ अर्ब १ करोड रुपैयाँभन्दा बढी भुक्तानी भएको छ। सडक तथा नवप्रवर्तनसम्बन्धी अध्ययन, अनुसन्धान तथा निर्माणाधीन भौतिक संरचनाको गुणस्तर परीक्षण गर्ने निकायमार्फत अघि बढाइएको आयोजनामा निर्माण कार्यलाई सम्झौता तथा निर्धारित कार्यतालिकाअनुसार सम्पन्न गर्नुपर्ने देखिएको छ।
आयोजनाअन्तर्गत सिद्धबाबा क्षेत्रमा १ हजार १२६ मिटर लामो मुख्य सुरुङ, ७८० मिटरका तीन वटा बाइपास सुरुङ, रक सेड तथा १ हजार ५०० मिटर डबल लेन सडक निर्माण गरिनेछ। उक्त कार्य २०८३ फागुन २५ गतेभित्र सम्पन्न गर्ने गरी निर्माण व्यवसायीसँग २०७८ फागुन २५ गते ७ अर्ब ३४ करोड २१ लाख रुपैयाँको सम्झौता भएको थियो।
चालु वर्षमा साइट कार्यालय स्थापना तथा सामान्य कार्यअन्तर्गत बिमा, विस्तृत आयोजना प्रतिवेदन तयारी र ११ केभी विद्युत् जडानका लागि ३४ करोड ४९ लाख २३ हजार रुपैयाँ तथा मुख्य र बाइपास सुरुङ निर्माणतर्फ २ अर्ब ६६ करोड ५४ लाख २८ हजार रुपैयाँ भुक्तानी भएको छ। १४औँ रनिङ बिलसम्म आयोजनामा कुल ३ अर्ब १ करोड ३ लाख ५१ हजार रुपैयाँ भुक्तानी भइसकेको छ।
प्राविधिक प्रतिवेदनअनुसार आ.ब २०८१।८२ मा मुख्य सुरुङतर्फ १ हजार ८९ मिटर खन्ने काम सम्पन्न भएको छ। त्यसैगरी तीन वटा बाइपास सुरुङमध्ये क्रमशः १५१, १६१ र १३० मिटर खन्ने काम भएको छ। आयोजनास्थलमा ढलान तथा पहिरो नियन्त्रणसँग सम्बन्धित संरचना निर्माणका लागि ढलान संरक्षणको कामसमेत भइरहेको जनाइएको छ।
सडक विभागअन्तर्गतका डिभिजन तथा योजना कार्यालय एवं सार्वजनिक निर्माणसँग सम्बन्धित अन्य कार्यालयबाट निर्माण हुने भौतिक संरचनाको गुणस्तर परीक्षण तथा सडक, सुरुङ र वैकल्पिक यातायातसम्बन्धी अध्ययन तथा अनुसन्धानका लागि सम्बन्धित केन्द्र स्थापना गरिएको हो।
आयोजनाको निर्धारित समयसीमा नजिकिँदै गएको अवस्थामा बाँकी निर्माण कार्यलाई तीव्रता दिई सम्झौता र कार्यतालिकाअनुसार काम सम्पन्न गर्नुपर्ने देखिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
