जनताको काम नगर्ने मेयर र मन्त्रीलाई कारबाही गर्ने लम्सालको चेतावनी

काठमाडौं । पूर्वाधारमन्त्री सुनील लम्सालले जनप्रतिनिधि तथा सार्वजनिक पदाधिकारीले जनसेवामा लापरबाही गरे कानुनअनुसार कारबाही गरिने चेतावनी दिएका छन्। तनहुँको शुक्लागण्डकी नगरपालिका–५, दुलेगौँडामा आयोजित राष्ट्रिय स्वतन्त्र पार्टी (रास्वपा) का नेता तथा कार्यकर्तासँगको कार्यक्रममा बोल्दै उनले जनताको काममा बेवास्ता गर्ने स्थानीय तथा प्रदेशस्तरका पदाधिकारीप्रति कडा चेतावनी दिएका हुन्।

मन्त्री लम्सालले जनप्रतिनिधिहरूको पहिलो दायित्व नागरिकप्रति उत्तरदायी भएर सेवा प्रवाह गर्नु भएको उल्लेख गर्दै जनताको काम नगर्ने वा सेवाग्राहीलाई दुःख दिने पदाधिकारीबारे सम्बन्धित निकायलाई जानकारी गराउन नागरिकसँग आग्रह गरे। उनले जनताको हितविपरीत काम गर्ने स्थानीय तहका प्रमुख तथा अन्य पदाधिकारीमाथि कानुनबमोजिम कारबाही प्रक्रिया अघि बढाइने बताए।

कार्यक्रममा बोल्दै उनले, “यदि कुनै मेयरले जनताको काम गर्नुभएन, जनतालाई अपहेलना गर्नुभयो भने हामीलाई जानकारी दिनुहोस्। आवश्यक कारबाही गर्छौं। प्रदेशका मन्त्रीले पनि त्यस्तै गर्नुभयो भने थुन्छौं,” भन्दै कडा चेतावनी दिएका थिए। उनको उक्त अभिव्यक्ति अहिले सामाजिक सञ्जालमा व्यापक रूपमा चर्चामा आएको छ।

मन्त्री लम्सालको आक्रामक अभिव्यक्ति भने पहिलो पटक सार्वजनिक भएको होइन। यसअघि पनि उनले काममा लापरबाही गर्ने निर्माण व्यवसायी (ठेकेदार)हरूको “खुट्टा भाँच्ने” अभिव्यक्ति दिएका थिए। उक्त अभिव्यक्तिले व्यापक आलोचना र बहस निम्त्याएको थियो।

यसपटक पनि प्रदेशस्तरका मन्त्रीसम्मलाई “थुन्ने” चेतावनी दिएको भिडियो सार्वजनिक भएपछि सार्वजनिक प्रशासनमा जवाफदेहिता, कानुनी प्रक्रिया तथा जनप्रतिनिधिको सार्वजनिक अभिव्यक्तिको मर्यादाबारे नयाँ बहस सुरु भएको छ। सामाजिक सञ्जालमा भाइरल बनेको भिडियोपछि मन्त्रीको अभिव्यक्तिलाई लिएर समर्थक र आलोचकबीच फरक–फरक प्रतिक्रिया देखिएका छन्।