मधेशका ११ केन्द्रमा त्रिविको एमबीएस परीक्षा स्थगित

काठमाडौं — त्रिभुवन विश्वविद्यालय (त्रिवि) ले मधेश प्रदेशका ११ वटा केन्द्रमा सञ्चालन हुन लागेको एमबीएस परीक्षा स्थगित गरेको छ। मधेशका केही जिल्लामा देखिएको असहज अवस्थाका कारण परीक्षा रोकिएको त्रिविले जनाएको छ।

व्यवस्थापन संकायअन्तर्गत एमबीएस दोस्रो तहको MKT 511: Marketing Management विषयको परीक्षा स्थगित गरिएको हो। स्थगित परीक्षाको नयाँ मिति पछि सार्वजनिक गरिनेछ। जनकपुर, मलंगवा, लालबन्दी, सिरहा, लहान, राजविराज, कञ्चनपुर, चन्द्रनिगाहपुर, गौर, सिमरा र वीरगञ्जका परीक्षा केन्द्र प्रभावित भएका छन्।

त्रिविले उक्त विषयबाहेक अन्य विषयका परीक्षा भने तय गरिएको तालिकाअनुसार नै सञ्चालन हुने स्पष्ट पारेको छ। सम्बन्धित विद्यार्थी र परीक्षा केन्द्रलाई आवश्यक जानकारी लिएर तयारी गर्न पनि आग्रह गरिएको छ।