रोल्पाको थबाङमा पहिरोमा १० जना बेपत्ता, खोजी जारी

काठमाडौँ । रोल्पाको थबाङ गाउँपालिका–५, बोटलबारामा पहिरोमा परेर १० जना बेपत्ता भएका छन्। जिल्ला प्रहरी कार्यालयका अनुसार बेपत्ताको खोजी तथा उद्धार कार्य जारी छ। बुधबार राति गएको पहिरोले घर तथा गोठ पुरिँदा दुई जनाको मृत्यु भएको थियो भने दुई जना घाइते भएका थिए। पहिरोले करिब छवटा घर प्रभावित भएको प्रहरीले जनाएको छ।

घटनास्थल रोल्पा र बागलुङ जिल्लाको सीमाना नजिक पर्छ। जिल्ला सदरमुकामबाट पनि यो क्षेत्र निकै टाढा रहेको बताइएको छ। पहिरो गएलगत्तै रातिबाटै प्रहरी टोली घटनास्थलमा खटिएको थियो। बिहीबार बिहानदेखि सुरक्षाकर्मी र स्थानीय बासिन्दा मिलेर बेपत्ता भएकाहरूको खोजी गरिरहेका छन्।

प्रमुख जिल्ला अधिकारी गङ्गाबहादुर क्षेत्रीका अनुसार जिल्लाका सुरक्षा निकायका प्रमुखसहितको टोली पनि घटनास्थल पुगेको छ। उनीहरूको नेतृत्वमा खोजी र उद्धारको काम भइरहेको छ। पहिरोका कारण प्रभावित परिवारलाई सुरक्षित स्थानमा लैजाने प्रयाससमेत भइरहेको छ।