पहिरो खसेपछि भोटेकोशी नदी आसपास उच्च सतर्कता

काठमाडौँ । चीनको न्यालम क्षेत्रमा ठूलो पहिरो खसेपछि भोटेकोशी नदीको बहाव प्रभावित भएको छ। नदीमा थप पहिरो खस्न सक्ने भएकाले तल्लो तटीय क्षेत्रका बासिन्दालाई सावधानी अपनाउन आग्रह गरिएको छ। बिहीबार बिहान करिब ६ः३० बजेदेखि न्यालमस्थित झिम्मु पोस्ट आसपासको भीरबाट ढुंगा र माटोसहित पहिरो खसिरहेको बताइएको छ। पहिरोको केही भाग नदीमा खसेपछि पानीको बहावमा अचानक परिवर्तन आउन सक्ने जोखिम देखिएको हो।

प्रहरी र सशस्त्र प्रहरीले घटनास्थल तथा नदीको अवस्थाबारे निरन्तर निगरानी गरिरहेका छन्। विशेषगरी बलेफी गाउँपालिकाका ड्यामसाइट, झोलुंगे, लामोसाँघु, खाडीचौर, अँधेरी, कोठे र बलेफी बजार आसपासका बासिन्दालाई सतर्क रहन भनिएको छ।

तर सिन्धुपाल्चोकका प्रमुख जिल्ला अधिकारी शशिधर घिमिरेले नदी आधा थुनिएको भन्ने कुरा गलत भएको बताएका छन्। उनका अनुसार पहिरोको थोरै भाग मात्रै नदीमा खसेको छ र भोटेकोशी सामान्य रूपमा बगिरहेको छ। अहिले आत्तिनुपर्ने अवस्था नरहेको भन्दै नदी किनारबाट टाढा रहन र बहाव बढे सुरक्षित स्थानमा जान आग्रह गरिएको छ।