विश्वकप २०२६ को नकआउट समिकरण पूरा, ३२ टोलीबीच उपाधि दौड सुरु

काठमाडौं । उत्तर अमेरिका (अमेरिका, मेक्सिको र क्यानडा) मा जारी फिफा विश्वकप २०२६ को समूह चरण सम्पन्न भएसँगै नकआउट चरणमा प्रवेश गर्ने ३२ टोलीको टुंगो लागेको छ। अर्जेन्टिना–जोर्डन तथा अस्ट्रिया–अल्जेरियाबीचका अन्तिम समूह चरणका खेल सकिएपछि राउण्ड अफ ३२ को सम्पूर्ण समीकरण तय भएको हो।

यस संस्करणमा पहिलो पटक ४८ राष्ट्र सहभागी भएका थिए। १२ समूहमा विभाजित प्रतियोगिताको समूह चरणमा कुल ७२ खेल सम्पन्न भएपछि प्रत्येक समूहका विजेता र उपविजेता गरी २४ टोली तथा उत्कृष्ट प्रदर्शन गर्ने आठ तेस्रो स्थानका टोलीले नकआउट चरणमा स्थान सुरक्षित गरेका छन्। टोली संख्या विस्तारसँगै यसपटक पहिलो पटक राउण्ड अफ ३२ पनि विश्वकपको औपचारिक चरणका रूपमा समावेश गरिएको हो।

साविक विजेता अर्जेन्टिना, साविक उपविजेता फ्रान्स, ब्राजिल, जर्मनी, स्पेन, इंग्ल्यान्ड, पोर्चुगल, नेदरल्यान्ड्स लगायत उपाधिका प्रमुख दाबेदार टोलीहरू सहज रूपमा नकआउट चरणमा पुगेका छन्। यता विश्वकप इतिहासका दुई पटकका च्याम्पियन उरुग्वे भने समूह चरणमा एक खेल पनि जित्न नसकी प्रतियोगिताबाट बाहिरिएको छ।

सह–आयोजक अमेरिका, मेक्सिको र क्यानडा तीनै टोलीले नकआउट चरणमा स्थान बनाएका छन्। विशेषगरी पहिलो पटक घरेलु भूमिमा विश्वकप आयोजना गरेको क्यानडाले विश्वकप इतिहासमै पहिलो जित र पहिलो अंकसहित पहिलो पटक नकआउट चरणमा पुग्दै नयाँ इतिहास रचेको छ।

यसपटक पुनरागमन गरेका नर्वे, बोस्निया एण्ड हर्जगोभिना र दक्षिण अफ्रिकाले पनि अन्तिम ३२ मा स्थान बनाएका छन्। अफ्रिकी टोली आइभरी कोस्ट पहिलो पटक नयाँ ढाँचाको नकआउट चरणमा पुग्दा, विश्वकपमा पहिलो सहभागिता जनाएको केप भर्डे अपराजित रहँदै नकआउटमा प्रवेश गरेर प्रतियोगिताकै सबैभन्दा ठूलो आश्चर्य बनेको छ। डेब्यु टोली कुरासाओ, उज्वेकिस्तान र जोर्डन भने समूह चरणबाटै बाहिरिएका छन्।

महादेशगत प्रदर्शनमा युरोप र अफ्रिकाको वर्चस्व देखिएको छ। युरोपबाट सहभागी १६ टोलीमध्ये १३ टोलीले नकआउट चरणमा स्थान बनाएका छन् भने अफ्रिकाबाट १० मध्ये ९ टोली अघिल्लो चरणमा पुगेका छन्। दक्षिण अमेरिकाबाट पाँच, उत्तर अमेरिकाबाट तीन तथा एसियाबाट जापान र अस्ट्रेलिया गरी दुई टोली मात्र अन्तिम ३२ मा पुगेका छन्। दक्षिण कोरिया, इरान र उरुग्वे गोलअन्तर तथा अंकका आधारमा बाहिरिएका प्रमुख टोली बने।

उत्कृष्ट तेस्रो स्थान हासिल गर्दै डिआर कंगो, स्विडेन, घाना, इक्वेडर, बोस्निया एण्ड हर्जगोभिना, पाराग्वे, सेनेगल र अल्जेरियाले पनि नकआउट यात्रा सुरक्षित गरेका छन्।

अब राउण्ड अफ ३२ अन्तर्गत हरेक खेल ‘गर या मर’ को अवस्थामा हुनेछ। पराजित टोली प्रतियोगिताबाट बाहिरिनेछ भने विजेता टोली अन्तिम १६ मा प्रवेश गर्नेछ। नकआउट चरणको पहिलो खेलमा दक्षिण अफ्रिकाले सह–आयोजक क्यानडासँग प्रतिस्पर्धा गर्नेछ। त्यसपछि ब्राजिल–जापान, जर्मनी–पाराग्वे, नेदरल्यान्ड्स–मोरक्को, फ्रान्स–स्विडेन, मेक्सिको–इक्वेडर, इंग्ल्यान्ड–डिआर कंगो, बेल्जियम–सेनेगल, अमेरिका–बोस्निया, स्पेन–अस्ट्रिया, पोर्चुगल–क्रोएसिया, स्विट्जरल्यान्ड–अल्जेरिया, अस्ट्रेलिया–इजिप्ट, अर्जेन्टिना–केप भर्डे तथा कोलम्बिया–घानाबीच रोमाञ्चक भिडन्त हुने तालिका रहेको छ।