मुर्माटपमा नेपाल टेलिकमको फोरजी सेवा,पर्यटक र स्थानीयलाई उच्च गतिको इन्टरनेट

काठमाडौं । नेपाल टेलिकमले मुगुको प्रसिद्ध पर्यटकीय गन्तव्य मुर्माटपमा फोरजी मोबाइल सेवा सञ्चालनमा ल्याएको छ। कम्पनीले असार १५ गतेदेखि सेवा औपचारिक रूपमा शुभारम्भ गरेको जनाएको छ। रारा राष्ट्रिय निकुञ्जभित्र अवस्थित मुर्माटप रारातालको मनोरम दृश्य अवलोकनका लागि लोकप्रिय गन्तव्यका रूपमा परिचित छ।

रारातालबाट केही घण्टाको पदयात्रापछि पुग्न सकिने मुर्माटपबाट राराताल, हिमशृंखला तथा कर्णाली र सुदूरपश्चिमका प्राकृतिक दृश्यहरू अवलोकन गर्न सकिन्छ। फोरजी सेवा विस्तारसँगै अब पर्यटक, स्थानीय बासिन्दा तथा पदयात्रीहरूले उच्च गतिको मोबाइल इन्टरनेट सेवा सहज रूपमा प्रयोग गर्न सक्ने नेपाल टेलिकमले जनाएको छ।

कम्पनीका अनुसार नयाँ सेवा सञ्चालन भएपछि मुर्माटप क्षेत्रसँगै आसपासका ट्रेकिङ मार्गमा पनि भरपर्दो सञ्चार सुविधा उपलब्ध हुनेछ। यसबाट पर्यटकहरूले आफ्नो यात्रा अनुभव, तस्बिर, भिडियो तथा प्रत्यक्ष प्रसारण (लाइभ अपडेट) सामाजिक सञ्जालमार्फत तत्कालै साझा गर्न सक्नेछन्।

नेपाल टेलिकमले आधुनिक दूरसञ्चार सेवाको पहुँच विस्तारले रारा क्षेत्रको पर्यटन प्रवर्द्धनमा महत्वपूर्ण योगदान पुग्ने विश्वास व्यक्त गरेको छ। साथै स्थानीय होटल, होमस्टे, पर्यटन व्यवसायी तथा सर्वसाधारणले डिजिटल सेवाको सहज उपयोग गर्न पाउने भएकाले स्थानीय आर्थिक गतिविधिमा समेत सकारात्मक प्रभाव पर्ने अपेक्षा गरिएको छ।

कम्पनीका अनुसार मुर्माटपमा जडान गरिएको टावरले उक्त क्षेत्रमा मात्र सेवा नदिई हुम्ला, बाजुरा लगायतका दुर्गम हिमाली जिल्लामा दूरसञ्चार सेवा विस्तारका लागि रिपिटर स्टेशनका रूपमा पनि काम गर्नेछ। यसबाट कर्णाली र सुदूरपश्चिम प्रदेशमा मोबाइल तथा डाटा सेवाको पहुँच र गुणस्तर थप सुदृढ हुने विश्वास गरिएको छ।

नेपाल टेलिकमले ‘राष्ट्रको सञ्चार’ भन्ने आफ्नो दायित्वअनुसार देशका दुर्गमदेखि सुगम क्षेत्रसम्म आधुनिक दूरसञ्चार सेवा तथा सूचना प्रविधिको पहुँच विस्तार गर्ने अभियानलाई निरन्तरता दिँदै आएको जनाएको छ। आगामी दिनमा पनि सेवा विस्तार, गुणस्तर अभिवृद्धि र विश्वसनीयता बढाउँदै डिजिटल नेपालको अवधारणालाई साकार बनाउन प्रतिबद्ध रहेको कम्पनीले उल्लेख गरेको छ।

यसअघि नेपाल टेलिकमले २०७६ मंसिर १९ गतेदेखि राराताल क्षेत्रमा फोरजी सेवा पूर्ण क्षमतामा सञ्चालनमा ल्याइसकेको थियो। मुर्माटपसम्म सेवा विस्तारसँगै रारा क्षेत्रको डिजिटल कनेक्टिभिटी थप सुदृढ भएको कम्पनीको दाबी छ।