मध्य अफ्रिकी गणतन्त्रमा तैनाथ नेपाली शान्ति सैनिकको अदलीबदली सम्पन्न

काठमाडौँ — मध्य अफ्रिकी गणतन्त्रमा तैनाथ नेपाली शान्ति सैनिकहरूको अदलीबदली प्रक्रिया सम्पन्न भएको छ। राष्ट्रसंघको आह्वानमा शान्ति स्थापना कार्यका लागि खटाइएको बहुआयामिक एकीकृत स्थिरीकरण मिसनअन्तर्गत कार्यरत युद्धभैरव गण (शान्ति सेना) को तेस्रो डफ्फालाई प्रतिस्थापन गर्न गोरखनाथ गण (शान्ति सेना) को चौथो डफ्फाका शान्ति सैनिकहरू मिसन क्षेत्रमा प्रस्थान गरेका हुन्।

गोरखनाथ गणका कुल २२५ जना शान्ति सैनिकहरूको अन्तिम टोली मिति २०८२ साल पौष १० गते मिसन क्षेत्रतर्फ प्रस्थान गरेको नेपाली सेनाले जनाएको छ। यससँगै, उक्त मिसनमा आफ्नो कार्यकाल पूरा गरेका युद्धभैरव गणका २२४ जना नेपाली शान्ति सैनिकहरू सोही दिन स्वदेश फिर्ता भएका छन्।

नेपाली सेनाले राष्ट्रसंघीय शान्ति मिसनमार्फत विश्व शान्ति स्थापना कार्यमा लामो समयदेखि सक्रिय सहभागिता जनाउँदै आएको छ। हाल मध्य अफ्रिकी गणतन्त्रमा नेपाली सेनाका कुल १ हजार १८८ जना शान्ति सैनिकहरू शान्ति स्थापना, नागरिक संरक्षण तथा स्थायित्व कायम गर्ने कार्यमा संलग्न रहेका छन्।